Atyraý oblystyq politsiia departamentiniń Jedel qimyldaityn arnaiy jasaǵynyń qyzmetkerleri prezident Qasym-Jomart Toqaev pen Ishki ister ministrliginiń basshylyǵyna úndeý joldady. Olar bólim komandirlerin qyzmetkerlerden aqsha jinady, laýazymdyq ókiletin asyra paidalandy jáne qaramaǵyndaǵy sarbazdardy qurylys jumystaryna májbúrledi dep aiyptap otyr, dep habarlaidy dalanews.kz.
Úndeý avtorlarynyń aitýynsha, qyzmetkerlerden janarmai, kólik pen qurylys materialdarynyń shyǵyny úshin 15 myń teńgeden jinalǵan. Sondai-aq arnaiy jasaq sarbazdary transheia men ájethana qazýǵa, ǵimarattardy syrlaýǵa jáne poligon turǵyzýǵa tartylǵan. Bul jumystar aptap ystyqta, qyzmetten bos ýaqytta atqarylǵany aityldy.
Qyzmetkerler atalǵan sharaǵa biýdjetten 10 million teńge bólingenin alǵa tartady. Soǵan qaramastan, qajetti shyǵyndardy ózderi óteýge májbúr bolǵanyn málimdedi.
Arnaiy jasaq ókilderiniń sózinshe, prokýratýra men Ulttyq qaýipsizdik komitetine shaǵymdanǵannan keiin jumys ornynda qysym kúsheigen. Buǵan deiin narazylyǵyn bildirgen birqatar qyzmetker tártiptik jaýapkershilikke tartylyp, keiin jumystan shyǵarylǵan.
Úndeý avtorlary basshylyqtyń áreketin tekserip, bopsalaý jáne laýazymdyq ókiletti asyra paidalaný derekteri boiynsha qylmystyq is qozǵaýdy surady.
Ázirge Atyraý oblysynyń politsiia departamenti bul málimdemege resmi túsinikteme bergen joq.
