Kún saiyn kofe, taksi, fast-fýd pen túrli onlain servisterge jumsalatyn azyn-aýlaq aqsha eleýsiz kórinýi múmkin. Alaida osy shyǵyndardy bir jylǵa eseptegende qomaqty soma jinalady. "Qarjylyq saýat" telegram arnasy "Latte faktory" uǵymyn túsindirip, aqshany basqarýdaǵy kúndelikti ádetterdiń mańyzyna nazar aýdardy, dep habarlaidy dalanews.kz.
Arna avtory áleýmettik jeliden kórgen podkast úzindisin mysalǵa keltiredi. Baǵdarlama qonaqtarynyń biri «ómirdiń máni aqshada emes» dese, ekinshi spiker qazirgi qoǵamda qarajatsyz kúndelikti qajettiliktiń ózin óteý qiyn ekenin aitqan.
"Qaltańda eki myń teńge bolmasa, kósheden kofe alyp ishe almaisyń. Avtobýsqa miný men qoǵamdyq dárethanaǵa kirýdiń ózine aqsha qajet", – degen ol.
Rasynda, naryqtyq zamanda tabystyń mańyzy zor. Degenmen qarjylyq jaǵdai tek qansha aqsha tabatynymyzǵa emes, ony qalai jumsaitynymyzǵa da bailanysty. Mamandardyń pikirinshe, aqsha jinaý úshin mindetti túrde milliondap tabýdyń qajeti joq. Eń bastysy – qoldaǵy qarajatty durys basqara bilý.
"Latte faktory" degen ne?
"Latte faktory" uǵymyn amerikalyq jazýshy ári qarjy sarapshysy Devid Bah keńinen tanytqan. Bul termin adamnyń kún saiyn mán bermei jumsaityn usaq shyǵyndarynyń ýaqyt óte kele qomaqty somaǵa ainalatynyn bildiredi.
Ańyzǵa ainalǵan mysal boiynsha, Devid Bah kún saiyn qymbat kofe satyp alatyn adamdarmen áńgimelesedi. Olar baspana alýǵa nemese investitsiia jasaýǵa qarajaty jetpeitinin aitady. Sonda sarapshy kúndelikti kofege ketetin aqshany eseptep, ony únemdep ári tiimdi baǵyttaǵan jaǵdaida birneshe jylda eleýli kapital jinaýǵa bolatynyn túsindiredi.
Munda másele kofeden tolyq bas tartýda emes. Kofeniń ornyna shokolad, fast-fýd, taksi nemese paidalanylmaityn aqyly qosymsha bolýy múmkin. Negizgi oi – kúndelikti qaitalanatyn shyǵyndardy baqylaý.
Máselen, kúnine jumsalatyn 1 500 teńge bir aida 45 myń teńgege, al bir jylda 540 myń teńgege jetedi. Bul qarajatqa qajetti tehnika satyp alýǵa, demalysqa shyǵýǵa nemese jinaq qoryn qalyptastyrýǵa bolady.
Usaq shyǵyn nege baiqalmaidy?
Kóp jaǵdaida bir-eki myń teńge kólemindegi tólemdi eleýli shyǵyn dep qabyldamaimyz. Kún saiyn taksimen júrý, syrttan tamaqtaný nemese qoldanylmaityn servisterdiń aqysyn tóleý ádetke ainalyp ketedi. Ár tólem jeke alǵanda az kóringenimen, ai sońynda biýdjetke aitarlyqtai salmaq túsiredi.
"Latte faktorynyń" negizgi maqsaty – adamdy súiikti kofesinen nemese shaǵyn qýanyshtarynan aiyrý emes. Bul tásil kúndelikti ádetterdiń jeke biýdjetke qalai áser etetinin kórsetip, shyǵynǵa sanaly qaraýǵa úiretedi.
"Qarjylyq saýat" arnasynyń jazýynsha, qajetsiz shyǵyndardy qysqartyp, únemdelgen qarajatty arnaiy shotqa salyp nemese tabys ákeletin quraldarǵa baǵyttaý arqyly birneshe jylda qomaqty qor jinaýǵa bolady.
Demalys kúnderi dúken aralap, saýda jasaý kóbeietini belgili. Sondyqtan kezekti zatty satyp almas buryn onyń shynymen qajet ekenin jáne sol aqshaǵa qandai balama baryn oilanǵan jón. "Latte faktorynyń" basty sabaǵy da osy – másele aqshanyń azdyǵynda ǵana emes, onyń qaida ketip jatqanyn bilýde.
