Batys Qazaqstan oblysynyń kámeletke tolmaǵandar isteri jónindegi mamandandyrylǵan soty on jastaǵy balanyń anasyn ata-ana quqyǵynan aiyrdy, dep habarlaidy dalanews.kz.
Joǵarǵy sottyń málimetinshe, bala týǵannan beri ishimdikke salynǵan jáne beibereket ómir súrgen anasymen birge turǵan. Ol mektepke múldem barmaǵan, oqyp-jazýdy úirenbegen. Bala tamaq pen kiimdi qoqys poligonynan izdeýge májbúr bolǵan.
Aldymen ol úsh aiǵa balalardy qoldaý ortalyǵyna ornalastyryldy. Keiin 2026 jyly otbasylyq úlgidegi balalar aýylyna qamqorlyqqa berildi. Osy ýaqyt aralyǵynda anasy ulyn birde-bir ret izdep kelmegen.
Psiholog balanyń aýyr psihologiialyq jaraqat alǵanyn anyqtady. Ol anasyna qaityp barýdan qorqatynyn ashyq aitqan.
«Anam meni qaitadan qoqys poligonyna alyp ketedi dep qorqamyn. Balalar aýylynda maǵan unaidy. Munda taza tósek pen jaqsy tamaq bar», dep aitqan bala.
Sot áieldiń ata-analyq mindetterin oryndaýdan jaltarǵanyn ári ómir saltyn ózgertýge niet tanytpaǵanyn anyqtady. Nátijesinde ol ata-ana quqyǵynan aiyrylyp, balanyń jeke depozittik shotyna aliment tóleýge mindetteldi.
Sot sheshimi zańdy kúshine endi.
