Qazaqstanda jan basyna shaqqandaǵy kúnkóris minimýmy 72 myń teńgeden asty. 2026 jyldyń úshinshi toqsanynyń qorytyndysy boiynsha bul kórsetkish aiyna 72 791 teńge boldy, dep habarlaidy dalanews.kz.
Statistikalyq málimetterge sáikes, kúnkóris minimýmy ekinshi toqsanmen salystyrǵanda 7,65%-ǵa, al ótken jyldyń osy kezeńimen salystyrǵanda shamamen 20%-ǵa ósken. Eske salsaq, biylǵy ekinshi toqsanda bul kórsetkish 67 618 teńge bolǵan edi.
Kúnkóris minimýmy adamnyń negizgi qajettilikterin qamtamasyz etý úshin qajet eń tómengi shyǵyn kólemin kórsetedi. Onyń ishinde 40 035 teńge nemese 55%-y azyq-túlikke jumsalsa, qalǵan 32 756 teńge azyq-túlikke jatpaityn taýarlar men túrli qyzmetterge arnalǵan.
Mamandar bul kórsetkishti respýblikalyq biýdjet týraly zańda bekitiletin jáne zeinetaqy men áleýmettik tólemderdi esepteý kezinde qoldanylatyn kúnkóris minimýmymen shatastyrmaýǵa shaqyrady.
Óńirler arasynda eń joǵary kúnkóris minimýmy Almaty qalasynda tirkelgen. Munda bir adamǵa qajetti eń tómengi ailyq shyǵyn kólemi 80 928 teńgeni qurady. Odan keiingi oryndarda Mańǵystaý oblysy (78 678 teńge) men Shyǵys Qazaqstan oblysy (76 283 teńge) tur.
Astana qalasynda kúnkóris minimýmy 75 486 teńge bolsa, Shymkentte 70 675 teńge deńgeiinde qalyptasty.
Al eń tómengi kórsetkish Batys Qazaqstan oblysynda baiqaldy. Bul óńirde bir adamǵa shaqqandaǵy kúnkóris minimýmy 63 796 teńge boldy.
Jyldyq ósim boiynsha Qyzylorda oblysy kósh bastady. Munda kórsetkish bir jylda 26,8%-ǵa artqan. Almaty qalasynda ósim 26,3%-dy, al Jambyl oblysynda 25%-dy qurady.
Jalpy, 2026 jyldyń qańtar-qyrkúiek ailary aralyǵynda Qazaqstan boiynsha jan basyna shaqqandaǵy ortasha kúnkóris minimýmy aiyna 68 188 teńge bolǵan.
