سوڭعى ۋاقىتتا الەۋمەتتىك جەلىلەر مەن ونلاين-حابارلاندىرۋ پلاتفورمالارىندا ەڭ تومەنگى جەتكىلىكتىلىك شەگىنەن (تجش) اساتىن زەينەتاقى جيناقتارىن شەشۋ بويىنشا دەلدالدىق قىزمەتتەر تۋرالى ۇسىنىستار قاراسى كوبەيگەن، ارينە اقىسىن تولەگەن جاعدايدا. وسىعان قاتىستى "بجزق" اق ەل ازاماتتارىنا الاياقتار قارماعىنا ءىلىنىپ قالماۋدى ەسكەرتەدى، دەپ جازادى Dalanews.kz.
"بجزق" اق ءوز سالىمشىلارى مەن الۋشىلارىنا مىنانى ەسكەرتەدى:
"زەينەتاقى جيناقتارىن الۋ قازاقستان رەسپۋبليكاسىنىڭ الەۋمەتتىك كودەكسىندە قاتاڭ بەلگىلەنگەن جاعدايلاردا عانا مۇمكىن. ەڭ الدىمەن، بۇل زەينەت جاسىنا تولۋ، 1 نەمەسە 2 توپتاعى مەرزىمسىز مۇگەدەكتىك، شەت ەلگە تۇراقتى تۇرۋعا كەتۋ، مۇراگەرلىك".
زەينەتاقى جيناقتارىن تۇرعىن ءۇي جاعدايلارىن جاقسارتۋعا جانە/نەمەسە ەمدەلۋگە زاڭنامامەن بەلگىلەنگەن شارتتار ساقتالعان جاعدايدا، تومەندەگى ازاماتتاردىڭ ساناتى پايدالانا الادى:
- ەڭ تومەنگى جەتكىلىكتىلىك شەگىنەن اساتىن جيناقتارى بار سالىمشىلار (تجش-دان اساتىن سوما شەگىندە)؛
- زەينەتاقىسى جوعالعان تابىستىڭ (بۇرىن الىنعان جالاقىسىنىڭ) كەمىندە 40% قۇرايتىن زەينەتكەرلەر - ولار شوتتا قالعان جيناقتارىنىڭ 50% دەيىن پايدالانا الادى؛
- ەڭبەك سىڭىرگەن جىلدارى بويىنشا زەينەتكەرلەر (جيناقتارىنىڭ 100% دەيىن پايدالانا الادى)؛
- زەينەتاقى اننۋيتەتى شارتىن جاساسقان سالىمشىلار (جيناقتارىنىڭ 100% دەيىن پايدالانا الادى).
زەينەتاقى جيناقتارىن تۇرعىن ۇيگە نەمەسە ەمدەلۋ سىندى ماقساتتى پايدالانۋ تەك ۋاكىلەتتى وپەراتورلار – ەكىنشى دەڭگەيدەگى بانكتەر ارقىلى مۇمكىن بولادى. تيىسىنشە، دەلدالدىق قىزمەتتەر قاجەت ەمەس. بۇل رەتتە بجزق ەشقانداي اقى المايدى.
"كۇماندى ارەكەتكە قاتىسۋعا كەلىسە وتىرىپ، ءسىز اقشاڭىزدى جوعالتۋ ءقاۋىپىن تۋدىرىپ قانا قويماي، بولاشاقتا باسقا الاياقتىق ارەكەتتەر ءۇشىن پايدالانىلۋى مۇمكىن جەكە دەرەكتەرىڭىزدىڭ ساقتالۋىنا دا ءقاۋىپ توندىرەسىز"، - دەيدى قورداعىلار.
بجزق ءوز سالىمشىلارى مەن الۋشىلارىنا مۇنداي ۇسىنىستاردى ەلەمەۋگە، تەك رەسمي كوزدەردەن اقپارات الۋعا جانە قۇقىقتىق تۇرعىدان قورعالعان سالادا عانا ارەكەت ەتۋگە قاتاڭ كەڭەس بەرەدى.
