ارمەنيادا ءوتىپ جاتقان قازاقستاننىڭ مادەني كۇندەرى اياسىندا ەريەۆان قالاسىندا اباي قۇنانباي ۇلى اتىنداعى ساياباقتىڭ سالتاناتتى اشىلۋى ءوتتى. ايتۋلى وقيعا مەملەكەت باسشىسى قاسىم-جومارت توقايەۆتىڭ ەريەۆانعا جاساعان رەسمي ساپارى بارىسىندا قول جەتكىزىلگەن مەملەكەتتەر باسشىلارى اراسىنداعى كەلىسىم ناتيجەسىندە جۇزەگە استى، دەپ حابارلايدى Dalanews.kz.

سالتاناتتى ءىس-شاراعا قازاقستان رەسپۋبليكاسىنىڭ رەسمي دەلەگاسياسىن باستاپ بارعان ق ر مادەنيەت جانە اقپارات ءمينيسترى ايدا بالايەۆا، ارمەنيا رەسپۋبليكاسىنىڭ ءبىلىم، عىلىم، مادەنيەت جانە سپورت ءمينيسترى جاننا اندرەاسيان، ەريەۆان قالاسى مەرىنىڭ ءبىرىنشى ورىنباسارى ارمەن پامبۋحچيان، قازاقستان رەسپۋبليكاسىنىڭ ارمەنيا رەسپۋبليكاسىنداعى توتەنشە جانە وكىلەتتى ەلشىسى بولات يمانبايەۆ، سونداي-اق قوس ەلدىڭ زيالى قاۋىم وكىلدەرى، جەرگىلىكتى تۇرعىندار مەن ارميان استاناسىنىڭ قوناقتارى قاتىستى.

ساياباقتىڭ اشىلۋ سالتاناتىندا قىسقاشا ءسوز سويلەگەن ايدا بالايەۆا ارمەنيا بيلىگىنە جانە جوبانىڭ جۇزەگە اسۋىنا اتسالىسقان بارلىق ازاماتتارعا العىسىن ءبىلدىردى. مينيستر بۇل وقيعانىڭ ەكى ەل اراسىنداعى مادەني ىنتىماقتاستىقتىڭ جاڭا كەزەڭىن بىلدىرەتىنىن اتاپ ءوتتى.

– ءبىز بۇگىن تاريحي وقيعانىڭ كۋاسى بولىپ وتىرمىز. ارمەنيا استاناسىندا قازاقتىڭ ۇلى اقىنى ءارى ويشىلى اباي قۇنانبايۇلىنا ارنالعان ساياباق اشىلدى.
قازاقستان رەسپۋبليكاسىنىڭ پرەزيدەنتى قاسىم-جومارت توقايەۆ ارمەنيا رەسپۋبليكاسىنا رەسمي ساپارى اياسىندا استانا قالاسىنداعى ءبىر كوشەگە ارميان ءالىپبيىنىڭ نەگىزىن قالاۋشى مەسروپ ماشتوس ەسىمىن بەرۋ تۋرالى ەكىجاقتى كەلىسىم جاسالعانى بەلگىلى.
بۇگىن ءبىز سول كەلىسىمنىڭ، دوستىق پەن تىعىز مادەني بايلانىستاردىڭ ايقىن كورىنىسىنە اينالعانىن كورىپ وتىرمىز، – دەدى ق ر مادەنيەت جانە اقپارات ءمينيسترى.

سالتاناتتى ءىس-شارا اياسىندا قازاقستان مەن ارمەنيا مينيسترلەرى ەكى ەل اراسىنداعى مادەني بايلانىستاردىڭ تامىرى تەرەڭدەپ، بولاشاقتا ودان ءارى نىعايا تۇسەتىنىنىڭ نىشانى رەتىندە ساياباققا اعاش وتىرعىزدى.

ايتا كەتەيىك، ابايعا ارنالعان ەسكەرتكىشتەر، بيۋستتەر مەن مەموريالدىق تاقتالار الەمنىڭ ونداعان ەلىندە – بوسنيا جانە گەرسەگوۆينا، گەرمانيا، گرۋزيا، يران، كورەيا، جۇڭگو، قىرعىزستان، ۆەنگريا، ەگيپەت، وزبەكستان، رۋمىنيا، تۇركيا، تۇرىكمەنستان، فرانسيا، شۆەيساريا جانە تاتارستاندا (رەسەي) ورناتىلعان.

مەرەكەلىك ءىس-شارا سوڭى اباي قۇنانباي ۇلىنىڭ «سەگىز اياق» شىعارماسىن ورىنداعان قازاقستاننىڭ دومبىراشىلار ءانسامبلى مەن اۆان مادەنيەت ءۇيىنىڭ جاس ونەرپازدارىنىڭ كونسەرتىمەن جالعاستى. سونىمەن قاتار قوناقتار قازاق حالقىنىڭ ۇلتتىق مادەنيەتىمەن، زاماناۋي ادەبيەتىمەن جانە ءداستۇرلى تاعامدارىمەن تانىستى.

بۇگىن مينيستر ايدا بالايەۆا باستاعان قازاقستاندىق دەلەگاسيا مەسروپ ماشتوس اتىنداعى كونە قولجازبالار عىلىمي-زەرتتەۋ ينستيتۋتى – ماتەنادارانعا بارىپ، ارميان حالقىنىڭ ەجەلگى جازبا مۇراسىمەن، ونىڭ ىشىندە ارميان ءالىپبيىنىڭ نەگىزىن قالاۋشىنىڭ قولتاڭباسى بار دەلىنەتىن مانۋسكريپتتەرمەن تانىستى.

مادەني كۇندەر بۇگىن ەريەۆان قالاسىنداعى ارام حاچاتۋريان اتىنداعى ورتالىق كونسەرت زالىندا وتەتىن گالا-كونسەرتپەن قورىتىندىلانادى.