مەملەكەت باسشىسى قاسىم-جومارت توقايەۆ Yessenov Technopark قىزمەتىمەن تانىستى، - دەپ حابارلايدى Dalanews.kz
قاسىم-جومارت توقايەۆ شاحماردان ەسەنوۆ اتىنداعى كاسپيي تەحنولوگيالار جانە ينجينيرينگ ۋنيۆەرسيتەتىنىڭ اۋماعىندا ورنالاسقان تەحنولوگيا پاركىنىڭ جۇمىسىمەن تانىستى.
پرەزيدەنتكە تەحنوپاركتىڭ زاماناۋي ينفراقۇرىلىممەن جاساقتالعانى جونىندە ايتىلدى. مۇنىڭ ءبارى ستارتاپتار مەن جوبالار ازىرلەۋمەن اينالىساتىن كاسىپكەرلەردى، ستۋدەنتتەردى، سونداي-اق وقۋشىلاردى قولداۋعا ارنالعان.
مەملەكەت باسشىسىنا يننوۆاسيالىق زەرتحانالار مەن شەبەرحانالار تانىستىرىلدى. وندا ستۋدەنتتەر مەن جاس ماماندار ەلەكترونيكا، روبوتتى تەحنيكا، لازەرمەن كەسۋ، اعاش جانە مەتالل وڭدەۋ، پوليگرافيا، 3D-ديزاين، تىگىنشىلىك داعدىلارىن مەڭگەرەدى.
پرەزيدەنت حالىقارالىق باعدارلاما بويىنشا ءىت-مامانداردى دايارلايتىن وقۋ ايماعىن جانە سيفرلىق ءارى تەلەكوممۋنيكاسيالىق قۇزىرەتتەردى دامىتۋعا باعىتتالعان زەرتحانانى ارالاپ كوردى.
قاسىم-جومارت توقايەۆ ستۋدەنتتەرمەن اڭگىمەلەسۋ بارىسىندا ءقازىر جاڭا تەحنولوگيالار مەن جاساندى ينتەللەكت باعىتتارىن دامىتۋ وزەكتى بولىپ وتىرعانىن جەتكىزدى. پرەزيدەنتتىڭ ايتۋىنشا، ەلىمىزدە كولىك-لوگيستيكا سالاسىنىڭ بىلىكتى ماماندارىنا سۇرانىس جوعارى. مەملەكەت باسشىسى جاستاردى كەلەشەكتىڭ كەپىلى سانالاتىن ساپالى ءبىلىم الۋعا شاقىردى.
