تاياۋدا «Canon» كومپانياسى ÓzgeEpic كرەاتيۆ حابىنىڭ قولداۋىمەن ورال قالاسىندا «كورىنبەيتىن الەم» اتتى بەدەرلى فوتوكورمە ۇسىندى، - دەپ حابارلايدى Dalanews.kz
دۇنيەجۇزىلىك دەنساۋلىق ساقتاۋ ۇيىمىنىڭ مالىمەتى بويىنشا، الەمدە 2،2 ميللياردتان استام ادام ءارتۇرلى كورۋ كەمشىلىكتەرىمەن ءومىر سۇرەدى. ال ولاردىڭ باسىم كوپشىلىگى ءۇشىن فوتوگرافيا، ۆيزۋال الەمى مۇلدەم تۇسىنىكسىز. قازاقستاندا شامامەن 160 مىڭ ادام وسىنداي شەكتەۋلەرمەن ءومىر سۇرۋدە. «كوزگە كورىنبەس الەم» كورمەسى كورۋ قابىلەتىنە قاراماستان، ونەرگە قول جەتكىزۋدى قامتاماسىز ەتۋ ارقىلى وسى كەدەرگىلەردى جويۋعا ۇمتىلادى.
كورمەنىڭ ماقساتى – ونەر جانە جاڭا تەحنولوگيالاردىڭ كومەگىمەن كورمەي-اق، سەزۋ جانە ەستۋ قابىلەتى ارقىلى قابىلداۋعا بولاتىن جاڭا تانىم كەڭىستىگىن قالىپتاستىرۋ.
ەكسپوزيسيادا تانىمال فوتوگرافتاردىڭ بەدەرلى سۋرەتتەرى، دىبىستىق سيپاتتامالارى جانە برايل قارپىمەن جازىلعان ماتىندەر ۇسىنىلدى. بۇل – كورۋ قابىلەتى شەكتەۋلى جانداردىڭ بەينەنى سەزىنۋ ارقىلى قابىلداۋىنا مۇمكىندىك بەرەدى. بۇل ينكليۋزيۆتى قوعامعا قاراي ماڭىزدى قادام جاساي وتىرىپ، زاماناۋي ونەر مەن تەحنولوگيالار ارقىلى شەكارالاردى جويۋعا ۇمتىلاتىن، كورۋ قابىلەتى قالىپتى ادامدار مەن كورۋ قابىلەتى شەكتەۋلى جانداردى بىرىكتىرەتىن ەرەكشە الاڭ.
«Canon» كومپانياسى سۋرەتتەردىڭ الەمدى وزگەرتۋگە قابىلەتتى ەكەنىنە سەنەدى، ال «كوزگە كورىنبەس الەم» كورمەسى يننوۆاسيالار ارقىلى ونەردى بارىنە قولجەتىمدى ەتۋگە بولاتىندىعىنىڭ جارقىن ۇلگىسى. زاماناۋي باسپا تەحنولوگيالارى بەينەلەردى تاكتيلدى تۇردە “كورۋگە” مۇمكىندىك بەرەدى، بۇل كورۋ قابىلەتى ناشار ادامدار ءۇشىن قابىلداۋدىڭ جاڭا كوكجيەكتەرىن اشادى»، – دەدى «Canon» كومپانياسىنىڭ وكىلى.
كوزگە كورىنبەيتىن الەم – ونەردى سەزىنۋ تاسىلدەرىن كەڭەيتۋ ارقىلى ينكليۋزيۆتى قوعام قۇرۋعا قوسقان ۇلكەن جوبا.
«بۇل كورمە – ءبىزدىڭ قوعامداعى ءاربىر ادامنىڭ ونەردى سەزىنىپ، ونىڭ قۋاتىن قابىلداۋىنا مۇمكىندىك بەرەتىن ماڭىزدى قادام. ÓzgeEpic حابىنداعى جۇمىسىمىزدىڭ وزەگى دە – كرەاتيۆتى شەشىمدەر ارقىلى بارشاعا ورتاق، قولجەتىمدى ورتا قالىپتاستىرۋ. Canon كومپانياسىمەن بىرلەسىپ قولعا الىنعان بۇل جوبا — كرەاتيۆ پەن تەحنولوگيانىڭ ادام جانىنا جول تابا الاتىنىن كورسەتەتىن جارقىن مىسال. كورمە ورال قالاسىندا ورنالاسقان كەڭىستىگىمىزدە ءبىر اي بويى قالا قوناقتارى مەن تۇرعىندارىنىڭ نازارىنا ۇسىنىلادى»، – دەپ اتاپ ءوتتى ÓzgeEpic كرەاتيۆ حابىنىڭ نەگىزىن قالاۋشى توعجان قۇرمانجان قىزى.
