رەسپۋبليكالىق ماڭىزى بار ءۇشارال - دوستىق - قحر شەكاراسى اۆتوجولىندا، كوكتۇما اۋىلى ماڭىندا ءىرى جول اپاتى تىركەلدى. بەس جەڭىل اۆتوكولىك سوقتىعىسقان، دەپ حابارلايدى Dalanews.kz

قازاۆتوجول كومپانياسىنىڭ مالىمەتىنشە، التى ادام زارداپ شەكتى. ولار الاكول اۋداندىق اۋرۋحاناسى جەتكىزىلگەن. زارداپ شەككەندەر ءتۇرلى دەنە جاراقاتىن العان.

ۇلتتىق كومپانيا وكىلدەرىنىڭ ايتۋىنشا، اپات بولعان ساتتە جولدىڭ بۇل بولىگى قولايسىز اۋا رايىنا بايلانىستى رەسمي تۇردە جابىق بولعان. ايماقتا بوران سوعىپ، قارلى بۇرقاسىن مەن نولدىك كورىنۋ تىركەلگەن. شەكتەۋ 13 اقپان كۇنى كۇندىز ەنگىزىلىپ، 17 اقپان تاڭەرتەڭگە دەيىن ساقتالۋى جوسپارلانعان.

الدىن الا مالىمەت بويىنشا، جۇرگىزۋشىلەر تىيىمدى جانە پوليسيا بەكەتتەرىن ەلەمەگەن. ولار جابىق ۋچاسكەنى اينالىپ ءوتىپ، دالا جولى ارقىلى تراسساعا قايتا شىققان. سالدارىنان ءبىر باعىتتا كەلە جاتقان كولىكتەر سوقتىعىسقان.

قۇتقارۋ جۇمىستارى كەزىندە قار قۇرساۋىندا قالعان تاعى 12 اۆتوكولىك شىعارىلدى.

جول قىزمەتتەرى جۇرگىزۋشىلەردى ەنگىزىلگەن شەكتەۋلەردى قاتاڭ ساقتاۋعا جانە جابىق ۋچاسكەلەردى اينالىپ وتۋگە تىرىسپاۋعا شاقىردى.