قازاقستاننىڭ ەلەمگە تانىلعان ەنشٸسٸ, ديماش قۇدايبەرگەن وليمپيادا چەمپيونى ميحايل شايدوروۆقا كٶلٸك سىيلايتىنىن مەلٸمدەدٸ. ٶنەر يەسٸنٸڭ بۇل قادامى ەلەۋمەتتٸك جەلٸدە قىزۋ تالقىلانىپ, جانكٷيەرلەردٸڭ زور قولداۋىنا يە بولدى, دەپ حابارلايدى Dalanews.kz
ايتا كەتەيٸك, جۋىردا ٶتكەن قىسقى وليمپيادا ويىندارىندا ەل نامىسىن ابىرويمەن قورعاعان ميحايل شايدوروۆ تاريحي جەتٸستٸككە جەتٸپ, قازاقستان قورجىنىنا التىن مەدال سالعان ەدٸ. ونىڭ مۇز ايدىنىنداعى ٶنەرٸ تەك سپورت جانكٷيەرلەرٸن عانا ەمەس, ٶنەر ەلەمٸن دە تەنتٸ ەتتٸ.
ەسٸرەسە, ەركٸن باعدارلاما كەزٸندە شايدوروۆتىڭ ديماشتىڭ رەپەرتۋارىنداعى ەندٸ تاڭداۋى كٶپشٸلٸكتٸ تولقىتتى. وسى سەتكە بايلانىستى ەنشٸ سپورتشىعا جٷرەكجاردى لەبٸزٸن بٸلدٸردٸ.
“دوسىم, قازاقتىڭ ماڭدايىنا بٸتكەن جارىق جۇلدىز دەنيس تەننٸڭ ورنىن جوقتاتپايمىن. مۇز ٷستٸندەگٸ ٶنەرٸڭ كٶپكە ٷمٸت پەن رۋح سىيلادى. مەنٸڭ ورىنداۋىمداعى ەندٸ تاڭداپ, مەنٸ دە مارقايتىپ قويدىڭ. ەلگە امان-ەسەن جەتٸپ الايىق. بٸر تەمٸر تۇلپارىڭ مەنٸڭ موينىمدا, باۋىرىم”, – دەدٸ ەنشٸ.
بۇل سٶزدەر كٶپشٸلٸكتٸڭ جٷرەگٸنە جەتتٸ. ٶنەر مەن سپورتتىڭ توعىسىندا تۋعان وسىنداي قولداۋ ەل ٸشٸندەگٸ بٸرلٸك پەن رۋحتى ايقىنداي تٷسكەندەي.
جەلٸ قولدانۋشىلارى ديماشتىڭ كەڭ پەيٸلٸنە ريزاشىلىق بٸلدٸرٸپ, شايدوروۆتىڭ بولاشاعىنا سەنٸم ارتتى. كٶلٸك سىيلاۋ – جاي عانا سىيلىق ەمەس, جاس سپورتشىعا كٶرسەتٸلگەن ٷلكەن قۇرمەت پەن قولداۋ ەكەنٸ انىق.
وسىلايشا, قازاقستاندىق جۇلدىزداردىڭ بٸر-بٸرٸنە دەمەۋ بولۋى – ەل مەرەيٸن ٷستەم ەتٸپ, جاس بۋىنعا ٷلگٸ بولارى سٶزسٸز.
