ۇجىمدىق قاۋىپسىزدىك تۋرالى شارت ۇيىمىنىڭ (ۇقشۇ) وقۋ-جاتتىعۋلارى 2026 جىلى بىرنەشە مۇشە مەملەكەتتىڭ اۋماعىندا، سونىڭ ىشىندە قازاقستاندا وتەدى، دەپ حابارلايدى Dalanews.kz
مالىمەتتى ۇيىمنىڭ بىرىككەن شتابىنىڭ باستىعى، گەنەرال-پولكوۆنيك اندرەي سەرديۋكوۆ بريفينگ بارىسىندا جاريا ەتتى.
ونىڭ ايتۋىنشا، 2026 جىلى بىرلەسكەن جانە جەدەل دايارلىق جوسپارى اياسىندا بارلىعى 60 ءىس-شارا ۇيىمداستىرۋ كوزدەلگەن. ونىڭ ىشىندە سەگىزى — كوماندالىق-شتابتىق جانە ارنايى وقۋ-جاتتىعۋلار.
قىركۇيەك ايىندا قازاقستان اۋماعىندا ورتالىق ازيا ءوڭىرىنىڭ جەدەل ورىستەتۋ ۇجىمدىق كۇشتەرىنىڭ قاتىسۋىمەن «رۋبەج» بىرلەسكەن وقۋ-جاتتىعۋى وتەدى. ال قىركۇيەك-قازان ايلارىندا رەسەيدە ۇجىمدىق جەدەل ارەكەت ەتۋ كۇشتەرىنىڭ قاتىسۋىمەن «ءوزارا ءىس-قيمىل» كوماندالىق-شتابتىق جاتتىعۋى، «ىزدەۋ» ارنايى بارلاۋ وقۋ-جاتتىعۋى جانە ماتەريالدىق-تەحنيكالىق قامتاماسىز ەتۋگە باعىتتالعان «ەشەلون» جاتتىعۋى ۇيىمداستىرىلادى.
قازان ايىندا تاجىكستان اۋماعىندا «كوبالت» جانە «سكالا» ارنايى وقۋ-جاتتىعۋلارى جوسپارلانعان.
جاتتىعۋلارعا تەرروريزمگە قارسى ورتالىق، تمد شەكارا اسكەرلەرى قولباسشىلارى كەڭەسى ۇيلەستىرۋ قىزمەتى جانە ۇقشۇ پارلامەنتتىك اسسامبلەياسى حاتشىلىعىنىڭ وكىلدەرى بايقاۋشى رەتىندە قاتىسادى.
ۇيىم وكىلدەرىنىڭ مالىمدەۋىنشە، ستراتەگيالىق جاتتىعۋلار بارىسىندا پىسىقتالعان قۇجاتتار الداعى بىرلەسكەن وقۋ-جاتتىعۋلاردى جوسپارلاۋعا نەگىز بولماق.
