ەلدىڭ 11 قالاسىندا اتموسفەرالىق اۋانىڭ لاستانۋ دەڭگەيى تۇراقتى تۇردە جوعارى كۇيىندە قالىپ وتىر، دەپ حابارلايدى Dalanews.kz.

ەكولوگيا جانە تابيعي رەسۋرستار مينيسترلىگى مالىمەتىنشە، 2025 جىلدىڭ قورىتىندىسى بويىنشا «قازگيدرومەت» دەرەكتەرىنە سايكەس، ەڭ پروبلەمالى قالالار قاتارىندا الماتى، وسكەمەن، قاراعاندى، تەمىرتاۋ، اقتوبە جانە ءبىرقاتار وزگە وڭىرلەر بار.

مينيسترلىك قورشاعان ورتاعا تۇسەتىن جۇكتەمەنى كەزەڭ-كەزەڭىمەن ازايتۋ جۇمىستارى جۇرگىزىلىپ جاتقانىن مالىمدەدى. قازىرگى تاڭدا 21 ءىرى كاسىپورىندا ۇزدىك قولجەتىمدى تەحنولوگيالار ەنگىزىلە باستادى، تاعى 22 ءوتىنىم قارالۋدا. سونىمەن قاتار 22 ەنەرگيا ءوندىرۋشى نىساندى جاڭعىرتۋ جونىندەگى كەشەندى جوسپار بەكىتىلگەن.

سونىمەن بىرگە شىعارىندىلاردىڭ ەداۋىر بولىگى شاعىن كوزدەردەن قالىپتاسادى. الماتىدا لاستانۋدىڭ شامامەن 60% كولىك قۇرالدارىنا، 12%-دان استامى جەكە سەكتور مەن شاعىن قازاندىقتارعا تيەسىلى. مۇنداي جاعداي وزگە ءىرى قالالاردا دا بايقالادى.

حالىقارالىق تاجىريبەنى، سونىڭ ىشىندە بەيجىڭ ۇلگىسىن ەسكەرە وتىرىپ، مينيسترلىك اكىمدىكتەرگە 2026–2028 جىلدارعا ارنالعان اتموسفەرالىق اۋانى قورعاۋ جونىندەگى وڭىرلىك ەرەجەلەر ازىرلەۋدى تاپسىردى. قۇجاتتاردا جەكە سەكتوردى گازداندىرۋ، قاتتى وتىندى پايدالانۋدى شەكتەۋ، قوعامدىق كولىكتى ەلەكتر جانە گازعا كوشىرۋ، سونداي-اق ەكولوگيالىق ايماقتاندىرۋ شارالارى كوزدەلۋى ءتيىس.

بۇدان بولەك، وڭىرلەرگە لاستانۋ بويىنشا جيىنتىق ەسەپتەردى جەدەلدەتۋ، قورشاعان ورتا ساپاسىنىڭ ماقساتتى كورسەتكىشتەرىن ايقىنداۋ جانە اۋانى قورعاۋ سالاسىنداعى ستراتەگيالىق قۇجاتتاردى بەكىتۋ تاپسىرىلدى.