Eldiń 11 qalasynda atmosferalyq aýanyń lastaný deńgeii turaqty túrde joǵary kúiinde qalyp otyr, dep habarlaidy Dalanews.kz.
Ekologiia jáne tabiǵi resýrstar ministrligi málimetinshe, 2025 jyldyń qorytyndysy boiynsha «Qazgidromet» derekterine sáikes, eń problemaly qalalar qatarynda Almaty, Óskemen, Qaraǵandy, Temirtaý, Aqtóbe jáne birqatar ózge óńirler bar.
Ministrlik qorshaǵan ortaǵa túsetin júktemeni kezeń-kezeńimen azaitý jumystary júrgizilip jatqanyn málimdedi. Qazirgi tańda 21 iri kásiporynda úzdik qoljetimdi tehnologiialar engizile bastady, taǵy 22 ótinim qaralýda. Sonymen qatar 22 energiia óndirýshi nysandy jańǵyrtý jónindegi keshendi jospar bekitilgen.
Sonymen birge shyǵaryndylardyń edáýir bóligi shaǵyn kózderden qalyptasady. Almatyda lastanýdyń shamamen 60% kólik quraldaryna, 12%-dan astamy jeke sektor men shaǵyn qazandyqtarǵa tiesili. Mundai jaǵdai ózge iri qalalarda da baiqalady.
Halyqaralyq tájiribeni, sonyń ishinde Beijiń úlgisin eskere otyryp, ministrlik ákimdikterge 2026–2028 jyldarǵa arnalǵan atmosferalyq aýany qorǵaý jónindegi óńirlik erejeler ázirleýdi tapsyrdy. Qujattarda jeke sektordy gazdandyrý, qatty otyndy paidalanýdy shekteý, qoǵamdyq kólikti elektr jáne gazǵa kóshirý, sondai-aq ekologiialyq aimaqtandyrý sharalary kózdelýi tiis.
Budan bólek, óńirlerge lastaný boiynsha jiyntyq esepterdi jedeldetý, qorshaǵan orta sapasynyń maqsatty kórsetkishterin aiqyndaý jáne aýany qorǵaý salasyndaǵy strategiialyq qujattardy bekitý tapsyryldy.
