2025 جىلعى مونيتورينگ قورىتىندىسى بويىنشا سىبايلاس جەمقورلىققا قارسى زاڭنامانى بۇزۋدىڭ 122 دەرەگى انىقتالىپ، ونداعان مەملەكەتتىك قىزمەتكەر جاۋاپكەرشىلىككە تارتىلدى، دەپ حابارلايدى Dalanews.kz.
مەملەكەتتىك قىزمەت ىستەرى اگەنتتىگىنىڭ مالىمەتىنشە، 13 ادام اكىمشىلىك جاۋاپكەرشىلىككە، 58 ادام تارتىپتىك جاۋاپكەرشىلىككە تارتىلعان. تاعى 43 تۇلعا مەملەكەتتىك قىزمەتتەن بوساتىلعان. سىبايلاس جەمقورلىق تاۋەكەلدەرىنە جۇرگىزىلگەن سىرتقى تالداۋ اياسىندا 655 ۇسىنىم بەرىلىپ، ونىڭ 57%-ى ورىندالعان.
بۇعان دەيىن اگەنتتىك ءتوراعاسىنىڭ ورىنباسارى سالاۋات مۇقسيموۆ سەنات وتىرىسىندا جەمقورلىققا قارسى ساياساتتى ىسكە اسىرۋ بارىسى تۋرالى بايانداعان. ونىڭ ايتۋىنشا، وتكەن جىلى پرەزيدەنت جارلىعىنا سايكەس اگەنتتىككە انتيكوررۋپسيالىق ساياساتتى قالىپتاستىرۋ جانە ىسكە اسىرۋ، جەمقورلىققا قارسى مادەنيەتتى دامىتۋ جانە قۇقىقبۇزۋشىلىقتىڭ الدىن الۋ وكىلەتتىگى بەرىلگەن. ءقازىر بۇل باعىتتاعى جۇمىس جۇيەلى نەگىزدە جۇرگىزىلۋدە.
انتيكوررۋپسيالىق ساياسات تۇجىرىمداماسى شەڭبەرىندە جوسپارلانعان 61 ءىس-شارانىڭ 46-سى ورىندالعان، بۇل 75%-دى قۇرايدى. رەفورمالاردىڭ نەگىزگى باعىتتارى رەتىندە سيفرلاندىرۋ جانە دەبيۋروكراتيزاسيا ايقىندالعان. مەملەكەتتىك ورگاندار مەملەكەتتىك قىزمەتتەردى وڭتايلاندىرۋ مەن اۆتوماتتاندىرۋدى جالعاستىرىپ، جاساندى ينتەللەكت تەحنولوگيالارىن ەنگىزۋدە.
سونىمەن قاتار «سيفرلىق تەڭگە» پلاتفورماسىندا بيۋدجەت قاراجاتىنىڭ قوزعالىسىن تۇپكى الۋشىعا دەيىن باقىلاۋعا مۇمكىندىك بەرەتىن «اقشانى بوياۋ» پيلوتتىق جوباسى ىسكە اسىرىلىپ جاتىر. بۇل تەتىك شىعىستاردىڭ اشىقتىعىن ارتتىرىپ، قاراجاتتىڭ ماقساتتى جۇمسالۋىن قامتاماسىز ەتۋگە باعىتتالعان.
قازىرگى تاڭدا پارلامەنتتە سىبايلاس جەمقورلىققا قارسى شارالاردى كۇشەيتۋگە باعىتتالعان ەكى زاڭ جوباسى قارالۋدا. بۇدان بولەك، «قازاقستان رەسپۋبليكاسىنىڭ مەملەكەتتىك قىزمەتى تۋرالى» زاڭنىڭ جاڭا رەداكسياسى ازىرلەنگەن. وندا مەملەكەتتىك قىزمەت قۇندىلىقتارىن جاڭارتۋ، قىزمەتكەرلەردىڭ مورالدىق-ەتيكالىق بەينەسىنە قويىلاتىن تالاپتاردى كۇشەيتۋ، كليەنتكە باعدارلانعان مودەلدى ەنگىزۋ جانە الدىن الۋ تەتىكتەرىن كۇشەيتۋ كوزدەلگەن.
اگەنتتىك وكىلدەرى جەمقورلىققا قارسى ساياساتتى جەتىلدىرۋ جانە حالىقارالىق ۇسىنىمداردى ىسكە اسىرۋ جۇمىستارى جالعاساتىنىن مالىمدەدى.ھ
