باتىس قازاقستان وبلىسىنىڭ تۇرعىنى زاڭسىز قىلمىستىق قۋدالاۋعا ۇشىراعانى ءۇشىن رەسپۋبليكالىق مەملەكەتتىك مەكەمەدەن 7،7 ملن تەڭگە ءوندىرىپ الدى، دەپ حابارلايدى Dala News.
وبلىستىق سوتتاردىڭ مالىمەتىنشە، ازامات 2023 جىلى التى اي ۋاقىتشا ۇستاۋ يزولياتورىندا بولىپ، ءبىر اي ءۇيقاماقتا وتىرعان. قىلمىستىق ءىس اياسىندا ول ۇزاق ۋاقىت تەكسەرىلىپ، تەرگەلگەن. الايدا كەيىن پروكۋراتۋرا قىلمىس قۇرامى بولماعانىن انىقتاپ، سوتقا دەيىنگى تەرگەپ-تەكسەرۋدى توقتاتۋ تۋرالى شەشىم قابىلداعان.
وسىدان كەيىن ازامات سوتقا جۇگىنىپ، 15 000 000 تەڭگە مورالدىق زيان جانە 4 000 000 تەڭگە ماتەريالدىق شىعىن ءوندىرۋدى تالاپ ەتكەن. ونىڭ ايتۋىنشا، تەرگەۋ بارىسىندا ۇنەمى كۇيزەلىسكە ءتۇسىپ، پسيحولوگيالىق قىسىم كورگەن جانە وزىنە قۇرمەتسىز قارىم-قاتىناس جاسالعان.
سوت تالاپتى ءىشىنارا قاناعاتتاندىرىپ، 3 000 000 تەڭگە مورالدىق زيان، 4 000 000 تەڭگە ماتەريالدىق شىعىن جانە 700 000 تەڭگە سوت شىعىندارىن ءوندىرىپ بەرۋ تۋرالى شەشىم شىعاردى.
