Batys Qazaqstan oblysynyń turǵyny zańsyz qylmystyq qýdalaýǵa ushyraǵany úshin respýblikalyq memlekettik mekemeden 7,7 mln teńge óndirip aldy, dep habarlaidy Dala News.
Oblystyq sottardyń málimetinshe, azamat 2023 jyly alty ai ýaqytsha ustaý izoliatorynda bolyp, bir ai úiqamaqta otyrǵan. Qylmystyq is aiasynda ol uzaq ýaqyt tekserilip, tergelgen. Alaida keiin prokýratýra qylmys quramy bolmaǵanyn anyqtap, sotqa deiingi tergep-tekserýdi toqtatý týraly sheshim qabyldaǵan.
Osydan keiin azamat sotqa júginip, 15 000 000 teńge moraldyq ziian jáne 4 000 000 teńge materialdyq shyǵyn óndirýdi talap etken. Onyń aitýynsha, tergeý barysynda únemi kúizeliske túsip, psihologiialyq qysym kórgen jáne ózine qurmetsiz qarym-qatynas jasalǵan.
Sot talapty ishinara qanaǵattandyryp, 3 000 000 teńge moraldyq ziian, 4 000 000 teńge materialdyq shyǵyn jáne 700 000 teńge sot shyǵyndaryn óndirip berý týraly sheshim shyǵardy.
