ءماجىلىس دەپۋتاتى اسحات ايماعامبەتوۆ نازاربايەۆ ۋنيۆەرسيتەتىندەگى ءبىلىم بەرۋ، مەملەكەتتىك ساياسات جانە بيزنەس مەكتەپتەرىن بىرىكتىرۋ تۋرالى ۇسىنىسقا الاڭداۋشىلىق ءبىلدىردى. بۇل پىكىرىن ول ماجىلىستەگى كوميتەت وتىرىسىندا ايتتى. وندا 2024 جىلعى رەسپۋبليكالىق بيۋدجەتتىڭ اتقارىلۋى جونىندەگى ۇكىمەت ەسەبى اياسىندا ۋنيۆەرسيتەت جۇمىسى قارالعان، دەپ حابارلايدى Dalanews.kz.
ايماعامبەتوۆتىڭ ايتۋىنشا، ۋنيۆەرسيتەتكە بولىنەتىن قارجى كولەمىنىڭ قىسقارۋىنا بايلانىستى وڭتايلاندىرۋ ماسەلەسى تۋىنداعان. الايدا دەپۋتات ساپا، اكادەميالىق ەركىندىك جانە حالىقارالىق بەدەل ۇنەمدەۋ ساياساتىنىڭ قۇربانى بولماۋى ءتيىس دەپ ەسەپتەيدى.
“بىرىكتىرۋ يدەياسى وپتيميزمنەن گورى الاڭداۋشىلىق تۋعىزادى. ماسەلەن، GSE قازىرگى تاڭدا الەمدىك ۇزدىك 200 وقۋ ورنى قاتارىنا ەنسە، GSPP مەن GSB — 600–800 قاتاردا. بىرىكتىرۋ ناتيجەسىندە جالپى رەيتينگ تومەندەپ، ۋنيۆەرسيتەتتىڭ بەدەلى مەن تارتىمدىلىعى السىرەۋى مۇمكىن. ءبىلىم بەرۋ مەكتەبىنىڭ (GSE) بىرەگەيلىگى قاتەرگە ۇشىرايدى. GSE – قازاقستانداعى ءبىلىم سالاسىنداعى ساپالى زەرتتەۋلەرمەن تانىلعان ساناۋلى اكادەميالىق برەندتەردىڭ ءبىرى. بىرىگۋ ونىڭ وزىندىك ەرەكشەلىگىن جويۋى ىقتيمال.”، — دەدى دەپۋتات.
سونداي-اق ول ءار مەكتەپتىڭ ءوز اكادەميالىق مادەنيەتى مەن حالىقارالىق اككرەديتاسيا تالاپتارى بار ەكەنىن اتاپ ءوتتى. ديسيپلينارلىق فوكۋس پەن زەرتتەۋ باعىتتارىنىڭ بۇلىڭعىرلانۋى حالىقارالىق گرانتتار مەن كادرلىق الەۋەتكە دە كەرى اسەر ەتۋى مۇمكىن.
“اكادەميالىق مادەنيەتتەر ءارتۇرلى. وسىنداي ءارتۇرلى تاسىلدەردى ارالاستىرۋ كوبىنەسە قاقتىعىستارعا، ماقساتتان اۋىتقۋعا جانە اكادەميالىق ورتاعا نۇقسان كەلتىرەدى.
اككرەديتاسيا تاۋەكەلى بار. ءار مەكتەپ حالىقارالىق اككرەديتاسيادان ءوز ستاندارتتارى بويىنشا وتەدى: AACSB، پەداگوگيكالىق جانە زەرتتەۋ تالاپتارى. بىرىكتىرىلگەن قۇرىلىم بۇل تالاپتارعا ساي بولماۋ ءقاۋپىن توندىرەدى. ءار ءتۇرلى سالالاردىڭ ءوزارا بايلانىسى تارتىمدى يدەيا بولعانىمەن، ايقىن يدەنتيچنوست پەن فوكۋستىڭ جوقتىعىنان اكادەميالىق تەرەڭدىكتىڭ جوعالۋى مۇمكىن. بۇنى تولىق بىرىكتىرۋسىز دە، ورتاق باعدارلامالار مەن جوبالار ارقىلى دامىتۋعا بولادى”، — دەپ ەسكەرتتى ايماعامبەتوۆ.
سونىمەن قاتار ول GSEء-نى نولدەن باستاپ قۇرعان وقىتۋشىلار اۆتونوميانىڭ، اكادەميالىق ورتانىڭ جانە دامۋ مۇمكىندىكتەرىنىڭ جوعالۋىنا بايلانىستى كەتۋى مۇمكىن ەكەنىن دە جەتكىزدى.
“قازىرگى تاڭدا جاڭا ۋنيۆەرسيتەتتەر اشىلىپ جاتقانىن ەسكەرسەك، ستۋدەنتتەر، زەرتتەۋشىلەر مەن گرانتتار دا ولارمەن بىرگە كەتۋى مۇمكىن”، — دەپ قوستى ول.
دەپۋتاتتىڭ پىكىرىنشە، بىرىكتىرۋ ۇنەمدەۋگە كەپىلدىك بەرمەيدى.
“كادرلاردىڭ كەتۋى، اكىمشىلىك شىعىنداردىڭ ءوسۋى، ءارتۇرلى اكادەميالىق مادەنيەتتەردىڭ قاقتىعىسى ناتيجەسىندە ۋادە ەتىلگەن تيىمدىلىك جويىلىپ كەتۋى مۇمكىن. ءىس جۇزىندە بۇل ۇنەمدەۋدەن گورى قوسىمشا قيىندىقتار تۋعىزۋى ىقتيمال”، — دەدى ول.
ونىڭ پىكىرىنشە، نازاربايەۆ ۋنيۆەرسيتەتى – ءبىلىم بەرۋ ساپاسىنىڭ جاڭا سيمۆولىنا اينالعان بىرەگەي جوبا. سوندىقتان شەشىمدەر ستراتەگيالىق تۇرعىدا قابىلدانۋى ءتيىس.
"بۇل ماسەلەدە ۋنيۆەرسيتەت باسشىلىعى بايىپتى ءارى سالماقتى شەشىم قابىلدايدى دەپ سەنەمىن"، — دەدى دەپۋتات.
