كاسىپكەر تۇرسىن الاگوزوۆتىڭ بۇرىنعى جۇبايى ليايسيرا مارات Instagram پاراقشاسىندا اشىق مالىمدەمە جاساپ، “100 پاتەر تاراتۋ” جونىندەگى كەڭ اۋقىمدى ناۋقاندى قايىرىمدىلىق ەمەس، ءساتتى ويلاستىرىلعان ماركەتينگتىك ايلا دەپ اتادى. سونداي-اق ول وتباسىلىق بيزنەستىڭ كولەڭكەلى تۇستارىن اشىپ، ءوزى قيىندىقتان شىعارعان كومپانيادان قانداي جولمەن شەتتەتىلگەنىن دە باياندادى، دەپ حابارلايدى Dalanews.kz.
ليايسيرانىڭ ايتۋىنشا، تۇرسىنمەن اجىراسقاننان كەيىن وعان Galanz Bottlers كومپانياسىنىڭ 43،25% ۇلەسى تيەسىلى بولعان. ال اپكەسىنىڭ ەنشىسىندەگى 7،5% ۇلەسپەن بىرگە ولار تولىق باقىلاۋدى قولعا الىپ، 2016 جىلى كاسىپتى باسقارۋعا كىرىسكەن.
“كومپانيا بىزگە 13 ميلليارد تەڭگە قارىزبەن ءوتتى. سەسنا بانكى دەفولت جاريالاۋعا دايىن ەدى. مەن بار ۇمىتپەن داۋرەن جاقسىبەكوۆپەن كەزدەسۋگە تىرىستىم. جالىنىپ، ءبىر جىل ۋاقىت سۇرادىم. سول ءبىر جىل ىشىندە ءبىز كاسىپتى قايتا اياققا تۇرعىزا الدىق”، – دەيدى ليايسيرا.
2018 جىلى كومپانيانىڭ قارجىلاي جاعدايى تۇراقتالا باستاعان. ءدال وسى ساتتە، ليايسيرانىڭ سوزىنە قاراعاندا، تۇرسىن الاگوزوۆ سول كەزەڭدە قازاقستانداعى ەڭ ىقپالدى اۋلەتتەردىڭ ءبىرى – ساتىبالدى كلانىنا جۇگىنگەن.
“ول مەنەن جانە سىڭلىمنەن “قۇتىلعىسى” كەلدى. سودان سوڭ قىسىم، تەرگەۋلەر، قىلمىستىق ىستەر باستالدى. كوماندا ۇنەمى ۇرەي مەن كۇيزەلىستە ءجۇردى. 2021 جىلدىڭ ورتاسىنا قاراي كومپانيانىڭ ساتۋ كولەمى 35 ميلليارد تەڭگەدەن استى. سول كەزدە-اق مەنى “كەتۋگە” ماجبۇرلەدى. ەگەر قارسىلاسسام، ءتىرى قالماس ەدىم”، – دەپ ەسكە الادى ول.
بۇدان كەيىن، ءبىر اپتا وتپەي جاتىپ، تۇرسىن الاگوزوۆ قايتادان ديرەكتور قىزمەتىنە ورالعان. ال بۇگىندە ول كوپشىلىكتىڭ نازارىن اۋدارعان “100 پاتەر” اكسياسىن جۇزەگە اسىردى. ءبىراق ءلايسيرا بۇل ارەكەتتى ناعىز قايىرىمدىلىق ەمەس، يميدج كوتەرۋگە باعىتتالعان ماركەتينگتىك امال دەپ ەسەپتەيدى.
“قايىرىمدىلىق – بۇل پايدا كوزدەلمەيتىن، ءاتى-جونى اتالمايتىن، شىن جۇرەكتەن جاسالاتىن ارەكەت. ال بۇل جولعى “جومارتتىقتىڭ” قۇنى – شامامەن 2 ميلليارد تەڭگە. بۇل سوما – ءونىمدى ماۋسىم الدىنداعى جارنامالاۋعا بولىنەتىن ماركەتينگتىك بيۋدجەتتىڭ تەڭ جارتىسى. شاي ساتۋ كەرەك، قويمادا قالىپ قويماسىن. سونىمەن قاتار، بۇل – جەكە بەدەلدى كوتەرۋ ءۇشىن جاسالعان قوسىمشا PR”، – دەيدى ول.
