Kásipker Tursyn Alagózovtiń burynǵy jubaiy Liaisira Marat Instagram paraqshasynda ashyq málimdeme jasap, “100 páter taratý” jónindegi keń aýqymdy naýqandy qaiyrymdylyq emes, sátti oilastyrylǵan marketingtik aila dep atady. Sondai-aq ol otbasylyq biznestiń kóleńkeli tustaryn ashyp, ózi qiyndyqtan shyǵarǵan kompaniiadan qandai jolmen shettetilgenin de baiandady, dep habarlaidy Dalanews.kz.
Liaisiranyń aitýynsha, Tursynmen ajyrasqannan keiin oǵan Galanz Bottlers kompaniiasynyń 43,25% úlesi tiesili bolǵan. Al ápkesiniń enshisindegi 7,5% úlespen birge olar tolyq baqylaýdy qolǵa alyp, 2016 jyly kásipti basqarýǵa kirisken.
“Kompaniia bizge 13 milliard teńge qaryzben ótti. Tsesna banki defolt jariialaýǵa daiyn edi. Men bar úmitpen Dáýren Jaqsybekovpen kezdesýge tyrystym. Jalynyp, bir jyl ýaqyt suradym. Sol bir jyl ishinde biz kásipti qaita aiaqqa turǵyza aldyq”, – deidi Liaisira.
2018 jyly kompaniianyń qarjylai jaǵdaiy turaqtala bastaǵan. Dál osy sátte, Liaisiranyń sózine qaraǵanda, Tursyn Alagózov sol kezeńde Qazaqstandaǵy eń yqpaldy áýletterdiń biri – Satybaldy klanyna júgingen.
“Ol menen jáne sińlimnen “qutylǵysy” keldi. Sodan soń qysym, tergeýler, qylmystyq ister bastaldy. Komanda únemi úrei men kúizeliste júrdi. 2021 jyldyń ortasyna qarai kompaniianyń satý kólemi 35 milliard teńgeden asty. Sol kezde-aq meni “ketýge” májbúrledi. Eger qarsylassam, tiri qalmas edim”, – dep eske alady ol.
Budan keiin, bir apta ótpei jatyp, Tursyn Alagózov qaitadan direktor qyzmetine oralǵan. Al búginde ol kópshiliktiń nazaryn aýdarǵan “100 páter” aktsiiasyn júzege asyrdy. Biraq Láisira bul áreketti naǵyz qaiyrymdylyq emes, imidj kóterýge baǵyttalǵan marketingtik amal dep esepteidi.
“Qaiyrymdylyq – bul paida kózdelmeitin, aty-jóni atalmaityn, shyn júrekten jasalatyn áreket. Al bul jolǵy “jomarttyqtyń” quny – shamamen 2 milliard teńge. Bul soma – ónimdi maýsym aldyndaǵy jarnamalaýǵa bólinetin marketingtik biýdjettiń teń jartysy. Shai satý kerek, qoimada qalyp qoimasyn. Sonymen qatar, bul – jeke bedeldi kóterý úshin jasalǵan qosymsha PR”, – deidi ol.
