وبلىس اكىمىنىڭ ورىنباسارى نۇربول تۇراشبەكوۆ كەلەس اۋدانىنداعى «ۋماروۆ ن» شارۋا قوجالىعىنىڭ قايتا وڭدەۋ سەحىن ارالاپ، جۇمىسىمەن تانىستى، دەپ حابارلايدى Dalanews.kz تۇركىستان وبلىسى اكىمىنىڭ باسپا ءسوز قىزمەتىنە سىلتەمە جاساپ.
كاسىپكەر تامشىلاتىپ سۋعارۋعا ارنالعان يىلگىش تۇتىك شىعارۋ ءۇشىن 2023 جىلى جۇڭگو ەلىنەن ارنايى قوندىرعى الىپ، ىسكە قوسقان.
قۇرىلعى ساعاتىنا 12000 مەتر ءونىم وندىرۋگە قۋاتتى. كاسىپورىندا سونىمەن قاتار، جىلىجايعا قولدانىلاتىن پلەنكا جانە ءجىپ شىعارىلادى. قولدانىستان شىققان پوليەتيلەن زاتتارىن قايتا تەرەڭ وڭدەۋ ارقىلى كوشەت ەگۋگە قاجەتتى قۇتىلار جاساۋ دا جولعا قويىلعان. سەح 6 ادامدى تۇراقتى جۇمىسپەن قامتىپ وتىر.
شارۋا قوجالىعىنىڭ باسشىسى نۇرجان وماروۆ سونداي-اق، ءوز جىلىجاي كەشەنىندە ماۋسىمدىق كەزەڭدە 25 ازاماتتى جۇمىسپەن قامتاماسىز ەتەتىنىن جەتكىزدى.
ماقتاارال اۋدانىنداعى «Cotton ماي» جاۋاپكەرشىلىگى شەكتەۋلى سەرىكتەستىگى دە شەتەلدەن جەتكىزىلگەن اۆتوماتتاندىرىلعان قوندىرعىلار ورناتىپ، جاڭا تەحنولوگيامەن ماقتا مايىن ءوندىرۋدى باستادى. كاسىپورىن تاۋلىگىنە 2 مىڭ توننا ءشيتتى وڭدەۋگە قاۋقارلى.
نۇربول تۇراشبەكوۆ اۋىل شارۋاشىلىعىن دامىتۋدا جاڭاشىلدىق ماڭىزدى ەكەنىن اتاپ ءوتتى.
– تەرەڭ وڭدەۋ تەحنولوگياسى مەن ونىڭ پايداسى تۋرالى شارۋالاردى كەڭىنەن اقپاراتتاندىرۋ قاجەت. زامان تالابىنا ساي ءونىم ۇسىنۋ ءۇشىن تەحنولوگيالىق جەتىستىكتەردەن شەت قالماۋىمىز شارت. وسى باعىتتاعى جۇمىستى رەتتەۋ ارقىلى نارىقتاعى اينالىمدى دا ءبىر جۇيەگە كەلتىرۋگە بولادى، – دەدى ول.
وبلىس اكىمىنىڭ ورىنباسارى جاۋاپتى ماماندارعا كاسىپكەرلەرمەن جانە شارۋالارمەن كەلىسە وتىرىپ، بۇل باعىتتا ناقتى ۇسىنىستار ازىرلەۋدى تاپسىردى.
