ۇلتتىق بانك ۇلتتىق ۆاليۋتانىڭ قۇبىلۋ جاعدايىن – شامادان تىس دەپ باعالايدى. بۇعان بۇگىن، 12 قاراشادا جاريالانعان ۆاليۋتا نارىعىنداعى جاعدايعا قاتىستى ۇلتتىق بانك ءتوراعاسىنىڭ ورىنباسارى ءاليا مولدابەكوۆانىڭ تۇسىنىكتەمەسىندە باسا نازار اۋدارىلادى، دەپ حابارلايدى Dalanews.kz.
"قازىرگى ۋاقىتتا ءبىز جاھاندىق قارجى نارىقتارى تىم قاتتى قۇبىلىپ تۇرعانىن بايقاپ وتىرمىز. بۇعان، البەتتە، اقش-تاعى پرەزيدەنت سايلاۋىنىڭ ناتيجەسى ايتارلىقتاي ىقپال ەتتى. دونالد ترامپتىڭ جەڭىسى اقش دوللارىن كۇشەيتىپ، دامۋشى ەلدەردىڭ ۆاليۋتالارى، سونىڭ ىشىندە تەڭگە دە السىرەدى. نەگىزگى الەمدىك ۆاليۋتالارعا شاققانداعى دوللار باعامىن كورسەتەتىن DXY يندەكسى قىركۇيەك ايىنىڭ سوڭىندا 100،8 تارماقتا تومەن مانگە جەتكەننەن كەيىن 5%-عا دەيىن نىعايىپ، 105،5 تارماققا دەيىن ءوستى. ەم ۆاليۋتالارىنىڭ يندەكسى قىركۇيەك ايىنىڭ سوڭىنان 4،2%-عا تومەندەدى (11 قاراشاداعى جاعداي بويىنشا)"، دەلىنگەن تۇسىنىكتەمەدە.
ونىڭ ۇستىنە، مولدابەكوۆانىڭ ايتۋىنشا،مۇناي كوتيروۆكالارى دا قالىپتى تۇردە تومەندەپ، ءبىر باررەلى 74-75 اقش دوللارىنان 71،83 اقش دوللارىنا دەيىن ءتۇستى (2024 جىلعى 11 قاراشاداعى جاعداي بويىنشا). سەبەبى الەۋەتتى ساۋدا باجدارى مەن دونالد ترامپتىڭ پرەزيدەنتتىك كەزەڭىندە اقش-تان كوپتەپ مۇناي جەتكىزۋدىڭ ءوزى شامادان تىس ارتىق ۇسىنىسقا اكەلەدى دەگەن ەكونوميستەردىڭ بولجامى اسەر ەتتى. ونىڭ ۇستىنە، قۋاتتى دوللار – قاشاندا شيكىزات تاۋارلارى ءۇشىن نەگاتيۆتى فاكتور سانالادى.
"سىرتقى نارىقتارداعى قۇبىلمالى جاعداي ۆاليۋتا نارىعىنا قاتىسۋشىلاردىڭ قيمىل-ارەكەتىنە دە اسەر ەتەدى. ءبىز شەتەل ۆاليۋتاسىنا ۇسىنىس ايتارلىقتاي تومەندەپ، وعان دەگەن سۇرانىستىڭ ءبىر مەزگىلدە وسكەنىن بايقاپ وتىرمىز. بۇل ءوز كەزەگىندە تەڭگە باعامىنىڭ السىرەۋىنە ىقپال ەتەدى. 2024 جىلعى قاراشانىڭ باسىنان بەرى ۇلتتىق ۆاليۋتانىڭ بيرجالىق ساۋدا-ساتتىقتاعى باعامى 1،4%-عا السىرەپ، 1 اقش دوللارى ءۇشىن 495 تەڭگەگە جەتتى"، - دەيدى سپيكەر.
ۇلتتىق بانك ءتوراعاسىنىڭ ورىنباسارى، وكىنىشكە قاراي، سپەكۋلياتيۆتىك سيپاتتاعى مامىلەلەردىڭ كوبەيگەنى دە بايقالىپ وتىرعانىن، بۇل دا ايىرباس باعامىن تىم قۇبىلتىپ جىبەرەتىنىن جەتكىزدى.
"وتىمدىلىك جەتكىلىكسىز جاعدايدا بۇل – باعامنىڭ ايتارلىقتاي اۋىتقۋىنا اكەلۋى مۇمكىن. ءبىز بۇعان دەيىن مالىمدەگەنىمىزدەي، ۇلتتىق بانك ۇلتتىق ۆاليۋتا باعامىنا ءتان وزگەرىستەرگە ءمان بەرە قويمايدى. ويتكەنى مۇنىڭ بارلىعى فۋندامەنتالدى فاكتورلارمەن دايەكتەلگەن. الايدا، سوڭعى كۇندەردەگى تەڭگەنىڭ قۇبىلۋىنا – تەك قانا فۋندامەنتالدى فاكتورلار ىقپال ەتپەي وتىرعانىن ايتۋعا ءماجبۇرمىز. وسىعان بايلانىستى ۇلتتىق بانك ۇلتتىق ۆاليۋتانىڭ قۇبىلۋ شاماسىن – شامادان تىس دەپ باعالايدى"، - دەيدى ول.
ۇلتتىق بانك ىشكى ۆاليۋتا نارىعىنداعى جاعدايدى قاداعالاپ وتىرعانى دا ناقتىلانادى.
"اعىمداعى ۇردىستەر، اسىرەسە، سپەكۋلياتيۆتى كوڭىل-كۇي ساقتالعان جاعدايدا، ءادىل باعام قالىپتاستىرۋدى قالپىنا كەلتىرۋ ءۇشىن جانە ۇلتتىق ۆاليۋتا باعامىنىڭ كۇرت وزگەرۋىنە جول بەرمەۋ ءۇشىن ۇلتتىق بانك جەدەل ارەكەت ەتىپ، ۆاليۋتالىق ينتەرۆەنسيا جۇرگىزۋگە دايىن"، دەلىنگەن ۇلتتىق بانك تۇسىنىكتەمەسىندە.
ايتا كەتسەك، بۇگىنگى تاڭدا ەلىمىزدەگى اقشا ايىرباس ورىندارىندا ورتاشا باعامدا 1 اقش دوللارى 495 تەڭگەدەن ساتىلۋدا.
قازاقستان قارجىگەرلەرى قاۋىمداستىعى قارجى نارىعىنا قاتىسۋشىلار اراسىندا جۇرگىزگەن ساۋالاناما ناتيجەسىنە سايكەس، 2025 جىلى قاراشا ايىندا ءبىر اقش دوللارى 507 تەڭگە بولۋى مۇمكىن.
ق ر ۇلتتىق بانك ءتوراعاسى تيمۋر سۇلەيمەنوۆ تە سوڭعى كەزدەرى كۇش العان دوللارعا قاتىستى ءوز پىكىرىن بىلدىرگەن بولاتىن.
ەكونوميكالىق ساياسات ينستيتۋتىنىڭ ديرەكتورى قايىربەك ارىستانبەكوۆ 1 اقش دوللارىنىڭ ناقتى قۇنى 600 تەڭگە بولۋى ءتيىس ەكەنىن، ءبىراق ونى ۇلتتىق بانك تەجەپ ۇستاپ وتىرعانىن ايتادى.
