قازاقستاننىڭ جەتى قالاسىندا ەكولوگيالىق ساۋاتتىلىقتى ارتتىرۋعا باعىتتالعان اۋقىمدى جوبا باستالدى، دەپ حابارلايدى Dala News.

اتىراۋ، تالدىقورعان، قاراعاندى، ورال، قونايەۆ، تۇركىستان جانە تاراز قالالارىندا ءوتىپ جاتقان باستاما «تازا قازاقستان» اكسياسى اياسىندا جۇزەگە اسىرىلۋدا. جوبانى ەكولوگيا جانە تابيعي رەسۋرستار مينيسترلىگى قولداپ، «جاسىل دامۋ» اق مەن «قازاقستان ەكولوگيالىق قورى» ۇيلەستىرۋدە.

جوبا اياسىندا تۇرعىندارعا، اسىرەسە وقۋشىلار مەن جاستارعا ارنالعان ەكولوگيالىق ءبىلىم بەرۋ دارىستەرى ۇيىمداستىرىلعان. باعدارلاما بەس مودۋلدەن تۇرىپ، تۇرمىستىق قالدىقتاردى دۇرىس باسقارۋ مادەنيەتىن قالىپتاستىرۋعا باعىتتالعان.

ماسەلەن، العاشقى مودۋلدە قالدىقتاردى قۇرعاق جانە ىلعالدى تۇردە بولەك جيناۋ تۇسىندىرىلسە، كەلەسى بولىمدەردە قوقىستى سۇرىپتاۋ، قايتا وڭدەۋ تاسىلدەرى جانە قاپتامالاردىڭ ەكولوگياعا اسەرى قاراستىرىلادى. سونداي-اق 3R قاعيداتى — ازايتۋ، قايتا پايدالانۋ جانە قايتا وڭدەۋ پرينسيپتەرى ۇيرەتىلەدى.

جوبا شەڭبەرىندە قالالارداعى مەكتەپتەردىڭ كەمىندە 10%-ى قامتىلىپ، مۇعالىمدەردىڭ دە 10%-ى ارنايى وقىتۋدان وتەدى دەپ جوسپارلانعان. بۇل ەكولوگيالىق ءبىلىمدى جۇيەلى تۇردە تاراتۋعا مۇمكىندىك بەرەدى.

سونىمەن قاتار قاتىسۋشىلار EcoQolday سيفرلىق پلاتفورماسىمەن تانىسىپ، قالدىقتاردى تاپسىرۋ مەن باقىلاۋ تەتىكتەرىن ۇيرەنەدى.

دارىستەردى پروفەسسورلار، عىلىم كانديداتتارى جانە تاجىريبەلى ماماندار جۇرگىزۋدە. جوبا تەك تەوريامەن شەكتەلمەي، تۇرعىنداردىڭ كۇندەلىكتى ومىردە ەكولوگيالىق داعدىلاردى قولدانۋىنا باعىتتالعان.

مامانداردىڭ ايتۋىنشا، مۇنداي باستامالار ەلدەگى ەكولوگيالىق مادەنيەتتى قالىپتاستىرۋعا جانە تابيعاتقا جاۋاپكەرشىلىكپەن قاراۋدى ارتتىرۋعا ىقپال ەتەدى.