استانا – پەتروپاۆل باعىتىنداعى پويىزدا جولاۋشى سانيتارلىق جۇيەنىڭ اقاۋىنان زارداپ شەكتى، دەپ حابارلايدى Dala News.
وقيعا تايىنشا – سميرنوۆو ارالىعىندا بولعان. پلاسكارت ۆاگونىندا كەلە جاتقان ايەل اجەتحاناعا كىرگەن ساتتە بيوتۋالەت ىستەن شىعىپ، ىشىندەگى قالدىقتار سىرتقا اتقىلاپ كەتكەن. ناتيجەسىندە جولاۋشىنىڭ كيىمى مەن اجەتحانا ءىشى تولىق لاستانعان.
جابىرلەنۋشىنىڭ ايتۋىنشا، وقيعا كەزىندە ۆاگون قىزمەتكەرلەرى جاعدايدى قالىپتى قابىلداپ، ودان تاسىمالداۋشىعا شاعىمى جوق ەكەنى تۋرالى قولحات جازۋدى سۇراعان.
الايدا جولاۋشى بۇل ۇسىنىستان باس تارتىپ، كولىكتەگى سانيتارلىق-ەپيدەميولوگيالىق باقىلاۋ دەپارتامەنتىنە شاعىم تۇسىرگەن. سونىڭ نەگىزىندە تەكسەرىس جۇرگىزىلدى.
تەكسەرۋ بارىسىندا اقاۋعا اجەتحانا جۇيەسىنىڭ بىتەلۋى سەبەپ بولعانى انىقتالدى. بيوتۋالەتكە جولاۋشىلار تاراپىنان پلاستيك بوتەلكەلەر مەن تاعام قالدىقتارى تاستالعان.
«قازاقستان تەمىر جولى» كومپانياسى بۇل جاعدايدى سانيتارلىق تالاپتاردى ساقتاماۋمەن بايلانىستىردى.
قىزمەتتىك تەكسەرىس ناتيجەسىندە پويىز باستىعى جۇمىستان بوساتىلىپ، ۋچاسكە باسشىسىنا قاتاڭ سوگىس جاريالاندى.
كومپانيا جولاۋشىلاردى بيوتۋالەتتەردى پايدالانۋ ەرەجەلەرىن ساقتاۋعا شاقىردى.
