تۇركىستان اۋەجايى ءوڭىردىڭ ءتۋريزمدى دامىتۋ باعىتىمەن ۇيلەسىمدى جۇمىس ىستەۋى كەرەك – دارحان ساتىبالدى

جاربول كەنت ۇلى 18 ءساۋ. 2024 13:48 1691

تۇركىستان وبلىسى اكىمى دارحان ساتىبالدىنىڭ توراعالىعىمەن تۇركىستانداعى حالىقارالىق اۋەجايدى دامىتۋ، الەۋەتىن كوتەرۋ جونىندە جينالىس ءوتتى، – دەپ حابارلايدى Dalanews.kz تۇركىستان وبلىسى اكىمىنىڭ باسپا ءسوز قىزمەتىنە سىلتەمە جاساپ.

تۇركىستان وبلىسى اكىمىنىڭ ءبىرىنشى ورىنباسارى زۇلپىحار جولداسوۆ پەن اۋەجايعا جاۋاپتى وكىلدەردىڭ ەسەپتەرى، جوسپارلارى تىڭدالدى.

وبلىس اكىمى اۋەجايدىڭ دامۋ جوسپارىن تۋريزممەن ۇيلەستىرۋ كەرەكتىگىن ايتتى. قازىرگى كورسەتكىشتەرگە كوڭىلى تولمايتىنىن جەتكىزدى.

– جولاۋشىلار كولىگى مەن تۋريزمگە جاۋاپتى باسقارمالار بىرلەسە جوسپار ازىرلەپ، جۇمىستى جۇيەلەسىن. اۋەجايدىڭ مۇمكىندىگىن ءتيىمدى پايدالانۋ كەرەك. جاڭا تۋريستىك باعىتتار، نىساندار، يدەيالار ۇسىنىپ، جۇزەگە اسىرىڭىزدار. بولمايدى بىلاي. باسشىلىق قىزمەت، جاۋاپكەرشىلىك جۇكتەلگەننەن سوڭ ەل سەنىمىن اقتاۋ ءۇشىن بار كۇشتەرىڭىزدى سالۋلارىڭىز كەرەك.

اۋەجاي باسشىلىعى دا اۋەجايدى دامىتۋ، تابىسىن كوتەرۋ، جولاۋشىلار اعىنىن كوبەيتۋ ءۇشىن جۇمىس ىستەۋى شارت. شەتەلدىڭ تاجىريبەسىن زەرتتەڭىزدەر، حالىقارالىق اۋە كومپانيالارىمەن بايلانىستى نىعايتىڭىزدار، – دەدى دارحان ساتىبالدى.

«ازىرەت سۇلتان» حالىقارالىق اۋەجايى 4 حالىقارالىق (ىستامبۇل، ەل-كۋۆەيت، ابۋ-دابي، سامارقان) جانە 6 رەسپۋبليكاىشىلىك (استانا، الماتى، اقتاۋ، اقتوبە، ورال، قوستاناي) اۋە باعىتتارىنا قىزمەت كورسەتۋدە. رەيستەردى «Turkish Airlines»، «Jazeera Airways»، «Wizz Air Abu Dhabi»، «Fly Arystan»، «Scat»، «Qazaq Air» اۋەكومپانيالارى ورىندايدى. اۋەجاي اپتاسىنا 32 رەيستى قابىلدايدى.

اۋەجايعا حالىقارالىق اۆياسيالىق ۇيىمداردىڭ ICAO جانە IATA (ICAO — UAIT، IATA — HSA) كودتارى بەرىلدى. اۋەجايدىڭ وتكىزۋ قابىلەتى ساعاتىنا – 450، جىلىنا 3 ميلليون جولاۋشىنى قۇرايدى. 2023 جىلى جولاۋشىلار اعىنى 359،5 مىڭ جولاۋشىنى قۇرادى (حالىقارالىق – 65،1 مىڭ جولاۋشى، ىشكى – 294،4 مىڭنان استى).

جيىندا جاۋاپتى تۇلعالاردىڭ جوسپارلارى، ۇسىنىستارى تىڭدالدى. ارنايى تۋرپاكەتتەر ازىرلەپ، تۋريستەردى تارتۋدىڭ ماڭىزدىلىعى ايتىلدى. وسى باعىتتا جۇمىس جاندانادى. سونىمەن بىرگە حالىقارالىق باعىتتار سانىن كوبەيتۋ باعىتىندا دا كەلىسسوزدەر جالعاسادى.


ۇسىنىلعان
سوڭعى جاڭالىقتار