اقتوبە وڭىرىندە ەكولوگيالىق سانانى قالىپتاستىرۋعا باعىتتالعان اۋقىمدى باستامالار جالعاسۋدا. بيىل 30 ناۋرىز – حالىقارالىق قالدىقسىز كۇن. اتاۋلى داتاعا وراي، سونداي-اق، پرەزيدەنت قاسىم-جومارت توقايەۆ باستاماشى بولعان «تازا قازاقستان» جالپىۇلتتىق جوباسىنىڭ اياسىندا وبلىستىڭ ءبىلىم بەرۋ ۇيىمدارىندا “قالدىقسىز قوعام” اكسياسى ءوتىپ، وقۋشىلار، ۇستازدار مەن اتا-انالاردى ورتاق ماقساتقا جۇمىلدىردى، دەپ حابارلايدى Dalanews.kz.
اكسيانىڭ باستى ماقساتى – جاس ۇرپاقتىڭ ەكولوگيالىق مادەنيەتىن ارتتىرۋ، تابيعاتقا جاناشىرلىق كوزقاراس قالىپتاستىرۋ جانە تۇرمىستىق قالدىقتارعا جاۋاپكەرشىلىكپەن قاراۋدى ۇيرەتۋ.
وبلىستىق ءبىلىم باسقارماسىنىڭ مالىمەتىنشە، ءوڭىر مەكتەپتەرىندە “قالدىقسىز ءومىر – جارقىن بولاشاق”، “تازا تابيعات – تازا بولاشاق” تاقىرىپتارىندا سىنىپ ساعاتتارى وتكىزىلىپ، وقۋشىلارعا قالدىقتاردى سۇرىپتاۋ مەن قايتا وڭدەۋدىڭ ماڭىزى جان-جاقتى ءتۇسىندىرىلدى. بۇل تەك تەوريالىق تۇسىندىرۋمەن شەكتەلمەي، ناقتى ىس-شارالارمەن تولىقتى.
مەكتەپ اۋماقتارىندا سەنبىلىكتەر ۇيىمداستىرىلىپ، وقۋشىلار قاعاز، پلاستيك جانە وزگە دە تۇرمىستىق قالدىقتاردى بولەك جيناۋعا بەلسەندى قاتىستى. ءبىلىم وردالارىندا ارنايى سۇرىپتاۋ جاشىكتەرى ورناتىلىپ، ەكولوگيالىق مادەنيەتتى ناسيحاتتاۋعا ارنالعان كورمەلەر، بايقاۋلار مەن چەللەندجدەر ءوتتى.
بۇل باستاماعا تەك وقۋشىلار عانا ەمەس، مۇعالىمدەر مەن اتا-انالار دا بەلسەندى ارالاستى. وسىنداي بىرلەسكەن ارەكەت قوعامدا ەكولوگيالىق جاۋاپكەرشىلىكتىڭ ارتىپ كەلە جاتقانىن كورسەتەدى.
“قالدىقسىز قوعام” اكسياسى – ءبىر كۇندىك شارا عانا ەمەس، تۇراقتى داعدى قالىپتاستىرۋعا باعىتتالعان ماڭىزدى قادام. سەبەبى بۇگىنگى تازالىق – ەرتەڭگى ۇرپاقتىڭ جارقىن بولاشاعى.
