الماتى قالاسى بويىنشا مەملەكەتتىك كىرىستەر دەپارتامەنتى حالىقارالىق اۋەجايدا ءۇندىستاننان جەتكىزىلگەن ءىرى دارى-دارمەك پارتياسى انىقتالعانىن مالىمدەدى، دەپ حابارلايدى Dalanews.kz.
ۆەدومستۆو مالىمەتىنشە، قۇجاتتاردا جۇك كوسمەتيكالىق ءونىم رەتىندە راسىمدەلگەن. الايدا تەكسەرۋ بارىسىندا ونىڭ ىشىندە جالپى سالماعى 1324 كەلىنى قۇرايتىن 39 ءتۇرلى دارى-دارمەك بار ەكەنى بەلگىلى بولعان. الدىن الا ەسەپ بويىنشا جۇكتىڭ كەدەندىك قۇنى 5 ملن تەڭگەدەن اسادى.
قازىرگى ۋاقىتتا اتالعان دەرەك بويىنشا تەكسەرۋ جۇرگىزىلۋدە. ونىڭ ناتيجەسىنە قاراي كىنالى تۇلعالاردى جاۋاپكەرشىلىككە تارتۋ ماسەلەسى شەشىلەدى.
مامانداردىڭ ايتۋىنشا، تاۋارلاردى دۇرىس دەكلاراسيالاماعانى نەمەسە جالعان مالىمەت كورسەتكەنى ءۇشىن جۇكتىڭ قۇنىنىڭ 25 پايىزى كولەمىندە ايىپپۇل قاراستىرىلعان. سونىمەن قاتار، ەۋرازيالىق ەكونوميكالىق وداق شەكاراسى ارقىلى تاۋارلاردى وتكىزۋ كەزىندە تىيىمدار مەن شەكتەۋلەردى بۇزعانى ءۇشىن 15-تەن 50 ايلىق ەسەپتىك كورسەتكىشكە دەيىن ايىپپۇل سالىنىپ، مۇلىك تاركىلەنۋى مۇمكىن.
دەپارتامەنت دەرەگىنە سايكەس، جىل باسىنان بەرى الماتى قالاسىندا ەسىرتكى زاتتارى بار تاۋارلاردى زاڭسىز اكەلۋدىڭ 17 دەرەگى انىقتالعان. مۇنداي جۇكتىڭ جالپى سالماعى 25،84 كەلىنى قۇراعان. بارلىق ماتەريالدار قۇقىق قورعاۋ ورگاندارىنا جولدانعان.
