قازاقستانداعى توتەنشە جاعدايعا بايلانىستى الەۋمەتتىك مەديا نۇرسۇلتان نازاربايەۆ قورى "بيلىكتىڭ بەدەلىن تۇسىرۋگە جانە قوعامدىق-ساياسي جاعدايدى تۇراقسىزداندىرۋعا باعىتتالعان اقپاراتتىق ناۋقان" جۇرگىزىپ وتىر دەپ جاريالادى. وسى تۇستا قور كوپشىلىككە مالىمدەمە جاسادى، دەپ حابارلايدى Dalanews.kz.
“قازاقستاندا سۋ تاسقىنى بولىپ، احۋال وتكىر سيپات الىپ تۇرعان شاقتا كەيبىر الەۋمەتتىك مەديا نۇرسۇلتان نازاربايەۆ قورى “بيلىكتىڭ بەدەلىن تۇسىرۋگە جانە قوعامدىق-ساياسي جاعدايدى تۇراقسىزداندىرۋعا باعىتتالعان اقپاراتتىق ناۋقان” جۇرگىزىپ وتىر دەپ جاريالادى. جاسىرىن دەرەككوز جاريالاعان اقپاراتتى جەكە تۇلعالار دا ايتىپ، نەگىزسىز ايىپ تاقتى”، - دەلىنگەن حابارلامادا.
نۇرسۇلتان نازاربايەۆ قورى بۇل جاريالانىم مەن مالىمدەمەنىڭ ەشقانداي وبەكتيۆتى ءارى ناقتى نەگىزى جوق ەكەنىن ايتادى. ولار قوعامعا شىنايى جانە سەنىمدى اقپارات بەرۋدىڭ ماڭىزدىلىعىن اتاپ كورسەتەدى.
“نۇرسۇلتان نازاربايەۆ قورىنىڭ قىزمەتىندە ساياسي دا، اقپاراتتىق-مانيپۋلياسيالىق تا سيپات جوق. قوردىڭ جۇمىسى تەك الەۋمەتتىك جوبالار مەن ازاماتتىق باستامالاردى دامىتۋعا، ەل جاستاردى قولداۋعا، قايىرىمدىلىق كومەك كورسەتۋگە باعىتتالعان.
بۇعان قوسا، نۇرسۇلتان نازاربايەۆ مەملەكەت باسشىسى قاسىم-جومارت توقايەۆتى جانە ونىڭ ساياسي باعىتىن ءاردايىم قولداعانىن جانە قولدايتىنىن ايتامىز. بۇل كۇندەرى ەل تۇرعىندارى سياقتى تۇڭعىش پرەزيدەنت تە سۋ تاسقىنىنان زارداپ شەككەن جاندارعا الاڭداپ وتىر. ءبىز مەملەكەت باسشىسى مەن ۇكىمەتتىڭ ەل وڭىرلەرىندە بۇرىن-سوڭدى بولماعان سۋ تاسقىنىنىڭ سالدارىن جويۋ جونىندەگى شاراسىن تولىعىمەن قولدايمىز”، - دەيدى قور.
مالىمدەمەگە سۇيەنسەك، نۇرسۇلتان نازاربايەۆ قورى زارداپ شەككەن ءوڭىر تۇرعىندارىن قولداۋ ءۇشىن العاشقىلاردىڭ ءبىرى بولىپ اقشا اۋدارىپ، قارجىلاي كومەك كورسەتكەن ەكەن.
ەسكە سالايىق، بۇعان دەيىن الەۋمەتتىك جەلىدە ەسكى قازاقستاندى جاقتاۋشىلاردىڭ بەلسەندىلىگى ارتتى.
ال تاراپ جاتقان اقپاراتتاردىڭ سارىنى ءبىر. ولار نازاربايەۆ بيلىكتە وتىرعان كەزدە حالىقتىڭ جاعدايى جاقسى بولىپتى دەگەن پىكىردى جەلەۋ ەتىپ ءجۇر. ماسەلەن، “ەلباسى نازاربايەۆ” دەپ اتالاتىن TikTok ارنانىڭ نازاربايەۆ تاراپىنا تۇسىرىلگەن ۆيدەولارى ميلليونداپ قارالىم جيناپ ۇلگەرگەن.
پاراقشاداعى ۆيدەولاردىڭ بىرىندە "حالىق نازاربايەۆقا شۇكىرشىلىك جاساي الماعانى" ايتىلادى.
"قارا سۋمەن جۇرگەن حالىقتى بالعا جەتكىزىپ ەدى! بارىڭدى باعالاي المادىڭدار. ەندى جارقىراپ ءومىر سۇرگەندەرىڭدى كورەيىك! ەلباسىم، سەنىڭ ءقادىرىڭدى تۇسىنبەگەن حالىقتان كەتكەنىڭ دە دۇرىس بولعان-اۋ!"، - دەيدى ۆيدەو اۆتورى.
بۇل ۆيدەوعا جازىلعان پىكىرلەر – "بوتتار ارمياسىنىڭ" جۇمىسى ءتارىزدى.
"تەك قازاقستاننىڭ ەمەس، الەمنىڭ كوشباسشىسى"
"اتامىز قايتىپ كەلسە، ەشكىمنەن قورىقپاي ءومىر سۇرەمىز"
"امان بولسىن، كورەگەن ەدى، ءبارىنىڭ الدىن الىپ وتىراتىن ەدى" - دەگەن سىڭايداعى پىكىرلەر كوپتەپ جازىلعان.
تاعى ءبىر ۆيدەودا سۋ تاسقىنىنا قاتىستى جاعداي كورسەتىلەدى. ۆيدەو مازمۇنى بويىنشا، "نازاربايەۆتىڭ كەزىندە مۇنداي جاعداي بولماعان".
جۋرناليست سىرىم يتقۇلوۆتىڭ سوزىنشە، ارىستاعى جارىلىس، شاحتالارداعى جارىلىس، قاڭتار وقيعاسى سەكىلدى الدىمىزدان شىققان پروبلەمالار الەۋمەتتىك ەكونوميكالىق تۇرعىدان دا، يدەولوگيالىق تۇرعىدان دا قۇلدىراۋ ەكەنىن كورسەتىپ وتىر.
"بۇل سول جۇمىستاردىڭ جەمىسى (ناقتى ايتقاندا جۇمىس اتقارىلماۋىنىڭ) – بۇگىن اياق استى ساعىنا قالعان، ەلدى 25 جىل باسقارعان بيلىكتىڭ جۇمىسى. (...) قازىرگى پروبلەمالاردىڭ كونتەكستىنە قاراساق، ولاردىڭ سەبەبى دە بەلگىلى: 30 جىلدا بىردە-بىر دامبا سالىنباعان، تكش مەن ينفراقۇرىلىمعا ينۆەستيسيا سالىنباعان"، - دەيدى جۋرناليست تەلەگرام ارناسىندا.
قالا بەردى، “ەلباسى كەتكەلى حالىقتىڭ جاعدايى ناشارلاپ كەتكەن” دەگەن مازمۇنداعى ۆيدەوپايدا بولعان.
ال بۇگىن ءماجىلىس دەپۋتاتى ەرلان سايروۆ ەسكى قازاقستان سۋ تاسقىنىن پايدالانىپ بيلىككە كەلمەك دەگەن ويىن ايتتى. ونىڭ سوزىنشە، قازىرگى تاڭدا پرەزيدەنت توقايەۆتى اقپاراتتىق دەڭگەيدە ديسكرەديتاسيالاۋ ءجۇرىپ جاتىر
"پرەزيدەنت توقايەۆ ق ر كونستيتۋسياسى بويىنشا قازاقستان رەسپۋبليكاسىنىڭ لەگيتيمدى پرەزيدەنتى. كەيبىر سىن ايتۋشىلار - سىن ايتىپ وتىرعان جوق. ولار ءبىزدىڭ ەلىمىزدە ساياسي دەستابيليزاسيا جاساۋعا تىرىسىپ وتىر. ولار ريەۆانشيستىك كۇشتەرگە كەرەك. ال ولار قيىن-قىستاۋ زاماندى پايدالانىپ، قايتادان بيلىككە كەلۋگە تىرىسىپ وتىر. ريەۆانشيستىك كۇشتەر دەگەن كىم؟ ولار بۇرىنعى مەملەكەت باسشىسىنىڭ اينالاسىندا ءجۇرىپ، بايىپ العان، قالتاسىن تولتىرىپ العان، حالىقتىڭ بۇكىل اقشاسىن جەپ ۇيرەنگەن"، - دەيدى دەپۋتات Abay live YouTube-ارناسىنابەرگەن سۇحباتىندا.
سايروۆتىڭ سوزىنشە، ولاردىڭ جوسپارى بويىنشا قازىرگى تاڭدا پرەزيدەنتتى اقپاراتتىق دەڭگەيدە دەسكرەديتاسيالاۋ بولىپ جاتىر.
"سونىمەن قاتار، "شال، كەل" دەگەن نەشە ءتۇرلى چەللەندج بولىپ جاتىر. مۇنىڭ ءبارى ۇيىمداسقان تۇردە بولىپ جاتىر. بۇل سىن ەمەس، مەملەكەتكە ءقاۋىپ ءتونىپ تۇرعان كەزدە مەملەكەتتىڭ ىشىنە ىرىتكى سالۋ"، - دەيدى دەپۋتات.
