الماتى قالاسىندا ەر ادامنىڭ جەدەل جاردەم قىزمەتكەرلەرىنە پىشاقپەن شابۋىل جاساعانى ۆيدەوعا ءتۇسىپ، الەۋمەتتىك جەلىلەردە تارادى، دەپ حابارلايدى Dalanews.kz.

وقيعا كەزىندە مەديسينا قىزمەتكەرلەرى شاقىرتۋ بويىنشا ناۋقاستىڭ ۇيىنە بارعان. الايدا ولاردى ماس كۇيدەگى ەر ادام قارسى الىپ، اگرەسسيۆتى ارەكەت تانىتىپ، پىشاقپەن قورقىتا باستاعان. مالىمەتتەرگە سايكەس، ول دارىگەرلەردى پاتەردە قاماپ ۇستاپ، كەيىن ولار سىرتقا شىققان كەزدە قۋىپ، پىشاقپەن قوقان-لوقى كورسەتكەن.

دارىگەرلەر قاۋىپسىزدىك ءۇشىن جەدەل جاردەم كولىگىنە كىرىپ، پوليسيا شاقىرۋعا ءماجبۇر بولعان.

پوليسيانىڭ حابارلاۋىنشا، كۇدىكتى ناۋقاستىڭ ۇلى بولىپ شىقتى. ول وقيعا ورنىندا ماس كۇيىندە بولىپ، اينالاسىنداعىلارعا ءقاۋىپ توندىرگەن.

اتالعان دەرەك بويىنشا قىلمىستىق كودەكستىڭ 380-3-بابى – مەديسينا قىزمەتكەرلەرىنە قاتىستى قورقىتۋ نەمەسە زورلىق-زومبىلىق كورسەتۋ فاكتىسىمەن قىلمىستىق ءىس قوزعالدى. ىستە ەكى جابىرلەنۋشى – دارىگەر مەن فەلدشەر بار. كۇدىكتىنىڭ كىناسى دالەلدەنسە، وعان 2 جىلدان 3 جىلعا دەيىن باس بوستاندىعىنان ايىرۋ جازاسى تاعايىندالۋى مۇمكىن.

كۇدىكتى ۇستالىپ، ۋاقىتشا ۇستاۋ يزولياتورىنا قامالدى. قازىرگى ۋاقىتتا تەرگەۋ امالدارى جۇرگىزىلۋدە.