سوڭعى جىلدارى قازاقستان شەتەلدىك ماماندار ءۇشىن تارتىمدى باعىتقا اينالىپ كەلەدى. ءبىلىم بەرۋ، IT، عىلىم مەن ونەر سالالارىندا ەلگە كەلىپ، ۇزاق مەرزىمدى كارەرا قۇرىپ جاتقان شەتەلدىكتەردىڭ سانى ارتىپ وتىر، دەپ حابارلايدى Dalanews.kz euronews-كە سىلتەمە جاساپ. 

قازاقستان جاڭا مۇمكىندىكتەر الاڭى

ساراپشىلاردىڭ ايتۋىنشا، ەلدەگى جاڭا سالالاردىڭ دامۋى، يننوۆاسيالار جانە كەڭ مۇمكىندىكتەر شەتەلدىكتەردى قىزىقتىرادى. اسىرەسە استانا حالىقارالىق ماماندار ءۇشىن جۇمىس پەن كاسىبي ءوسۋدىڭ ورتالىعىنا اينالىپ كەلەدى.

مىسالى، روبوتوتەحنيكا سالاسىنىڭ مامانى حۋسەين اتاكان ۆارول باستاپقىدا قازاقستانعا ۋاقىتشا كەلگەن. الايدا بۇل ساپار 15 جىلدىق كارەراعا ۇلاسىپ، ول بۇگىندە جەتەكشى ۋنيۆەرسيتەتتەردىڭ بىرىندە پروفەسسور ءارى عىلىمي ينستيتۋت باسشىسى بولىپ جۇمىس ىستەيدى.

ءبىلىم مەن تاجىريبە الماسۋ ورتاسى

قازاقستانداعى كوپتىلدى ءبىلىم بەرۋ جۇيەسى دە شەتەلدىك ۇستازداردى تارتىپ وتىر. شەتەلدىك مۇعالىمدەر ەلگە كەلىپ، تاجىريبە جيناپ قانا قويماي، جاڭا مادەني ورتادا كاسىبي تۇرعىدا ءوسىپ جاتقانىن ايتادى.

ولاردىڭ پىكىرىنشە، قازاقستان – كۇتكەننەن الدەقايدا اشىق ءارى قوناقجاي ەل. بۇل فاكتور دا ۇزاق ۋاقىتقا قالۋعا اسەر ەتەدى.

استانا - IT-حاب

ەلوردا ايماقتاعى تەحنولوگيالىق ورتالىققا اينالىپ كەلەدى. Astana Hub IT-پاركى مەن Digital Nomad Visa باعدارلاماسى شەتەلدىك IT ماماندارعا قولايلى جاعداي ۇسىنىپ وتىر.

شەتەلدىك ايتيشنيكتەر قازاقستاندى زاماناۋي، ءقاۋىپسىز جانە ينفراقۇرىلىمى دامىعان ەل رەتىندە باعالايدى. اسىرەسە تۇراقتى ينتەرنەت پەن ءومىر سۇرۋگە قولايلى ورتا ماڭىزدى ءرول اتقارادى.

ونەر سالاسى دا تارتىمدى

قازاقستان تەك تەحنولوگيا ەمەس، مادەنيەت ارقىلى دا شەتەلدىكتەردى قىزىقتىرۋدا. «استانا وپەرا» تەاترى الەمنىڭ ءار تۇكپىرىنەن ارتىستەردى تارتىپ، كاسىبي وسۋگە مۇمكىندىك بەرىپ وتىر.

شەتەلدىك بالەت ارتىستەرى قازاقستانداعى شىعارماشىلىق ورتا مەن حالىقارالىق دەڭگەيدەگى رەپەرتۋاردى ەرەكشە اتاپ وتەدى.

قازاقستان - ترانزيت ەمەس، تاڭداۋ

ساراپشىلاردىڭ ايتۋىنشا، ەل ۆيزالىق رەجيمدى جەڭىلدەتىپ، ۇزاق مەرزىمگە كەلەتىن ماماندارعا جاعداي جاساپ وتىر. سونىڭ ناتيجەسىندە قازاقستان كوپتەگەن شەتەلدىك ءۇشىن ۋاقىتشا ايالداما ەمەس، ءومىر ءسۇرىپ، جۇمىس ىستەۋگە بولاتىن ەلگە اينالىپ كەلەدى.

قورىتىندىسىندا، قازاقستان شەتەلدىك ماماندار ءۇشىن جاڭا مۇمكىندىكتەر، كاسىبي ءوسىم جانە تۇراقتى ءومىر ۇسىناتىن باعىت رەتىندە قالىپتاسىپ جاتىر.