2025 جىلدىڭ 27-28 ناۋرىز كۇندەرى تۇركىستان قالاسىندا ءبىلىم مازمۇنىن دامىتۋ ينستيتۋتىنىڭ ۇيىمداستىرۋىمەن حالىقارالىق پەداگوگيكالىق سامميت ءوتتى. جيىننىڭ باستى تاقىرىبى – جۇسىپبەك ايماۋىت ۇلىنىڭ پەداگوگيكالىق مۇراسى جانە ن.ا. ورازاحىنوۆانىڭ «ساتىلاي كەشەندى وقىتۋ» تەحنولوگياسىنىڭ جاڭاشىلدىعى بولدى، دەپ حابارلايدى Dalanews.kz
حالىقارالىق جيىندى پەداگوگيكا عىلىمدارىنىڭ دوكتورى، پروفەسسور، رەسەي جاراتىلىستانۋ عىلىمدار اكادەمياسىنىڭ كوررەسپوندەنت-مۇشەسى، ق ر كىشى عىلىم اكادەمياسىنىڭ ۆيسە-پرەزيدەنتى ءارى «ساتىلاي كەشەندى وقىتۋ» تەحنولوگياسىنىڭ نەگىزىن قالاۋشى نۇرشا الجانباي قىزى ورازاحىنوۆا اشتى. ءوز سوزىندە ول حح عاسىرداعى كورنەكتى پەداگوگ، پسيحولوگ جۇسىپبەك ايماۋىت ۇلىنىڭ بۇگىنگى ءبىلىم جۇيەسىندەگى ءرولى مەن ماڭىزىن اتاپ ءوتىپ، ءداستۇرلى پەداگوگيكا مەن زاماناۋي ءبىلىم بەرۋ تەحنولوگيالارىن ۇيلەستىرۋدىڭ مۇمكىندىكتەرىنە توقتالدى.
سامميت اياسىندا 28 ناۋرىز كۇنى «ءتىلىم مەنىڭ – تىرلىگىمنىڭ ايعاعى» تاقىرىبىندا اۋىزشا كوماندالىق وليمپيادا ءوتتى. بۇل ءبىلىم سايىسى وقۋشىلاردىڭ جالپى پاندەر بويىنشا باسەكەلەسۋ قابىلەتىن دامىتۋ، دارىندى بالالاردىڭ عىلىمي-تانىمدىق بەلسەندىلىگىن ارتتىرۋ جانە ۇلتتىق قۇندىلىقتاردى دارىپتەۋ ماقساتىندا ۇيىمداستىرىلدى. وليمپيادا ءتورت كەزەڭنەن تۇردى: مەكتەپىشىلىك، وبلىستىق (قالالىق)، رەسپۋبليكالىق جانە حالىقارالىق كەزەڭدەر. وليمپياداعا ەلىمىزدىڭ ءار وڭىرىنەن – الماتى، استانا قالالارى، پاۆلودار، اتىراۋ، تۇركىستان وبلىستارى، سونداي-اق قىرعىزستان مەن موڭعوليادان 101 وقۋشى مەن 57 جەتەكشى قاتىستى.
قازىلار القاسى قاتىسۋشىلاردىڭ ءبىلىمىن باعالاۋ بارىسىندا ولاردىڭ عىلىمي نەگىزدە بايانداۋ شەبەرلىگىنە، ءپان مازمۇنىن اشۋ قابىلەتىنە، تەوريالىق ماتەريالدى پراكتيكالىق تۇرعىدان تالداۋ داعدىسىنا، قازاق حالقىنىڭ كلاسسيك اقىندارى مەن جازۋشىلارىنىڭ شىعارمالارىن مانەرلەپ وقۋىنا جانە ءوز كوزقاراسىن شەشەندىكپەن جەتكىزە بىلۋىنە ەرەكشە نازار اۋداردى.
وليمپيادا ناتيجەسىندە كوماندالىق جارىستا باس جۇلدەنى موڭعوليادان كەلگەن «اتامەكەن» توبى مەن قىرعىزستاننان كەلگەن «ۋمتۋل» توبى جەڭىپ الدى. ءبىرىنشى ورىندى استانا قالاسىنىڭ، ەكىنشى ورىندى الماتى قالاسىنىڭ، ءۇشىنشى ورىندى تۇركىستان قالاسىنىڭ كوماندالارى يەلەندى. سونىمەن قاتار، ءى دارەجەلى ديپلوممەن – 35 وقۋشى، ءىى دارەجەلى ديپلوممەن – 26 وقۋشى، ءىىى دارەجەلى ديپلوممەن – 23 وقۋشى، ال گراموتامەن – 17 وقۋشى ماراپاتتالدى. جەڭىمپازدارعا ماراپاتتارىن ءبىلىم مازمۇنىن دامىتۋ ينستيتۋتىنىڭ ديرەكتورى راقىمبەردى جەتىباي تابىستادى.
راقىمبەردى جەتىباي ءسوز كەزەگىندە جەڭىمپازدار مەن قاتىسۋشىلاردى قۇتتىقتاپ، ءىس-شارانىڭ ماڭىزدىلىعىنا توقتالدى:
«بۇل وليمپيادا – ءبىلىم مەن ۇلتتىق قۇندىلىقتاردىڭ توعىساتىن الاڭى. وقۋشىلار تەك ءبىلىم جارىسىنا قاتىسىپ قانا قويماي، ءوز مادەنيەتى مەن ءداستۇرىن قۇرمەتتەۋدى، ونى تەرەڭ ءتۇسىنۋدى ۇيرەنەدى. مۇنداي ماڭىزدى ءىس-شارالار جاس ۇرپاقتىڭ سانالى، جان-جاقتى ءارى ءبىلىمدى بولىپ قالىپتاسۋىنا زور ىقپال ەتەدى».
حالىقارالىق سامميت ءداستۇرلى پەداگوگيكا مەن يننوۆاسيالىق ءبىلىم بەرۋ تەحنولوگيالارىن بىرىكتىرۋگە ارنالعان ماڭىزدى الاڭ بولدى. وقۋشىلاردىڭ عىلىمي-تانىمدىق بەلسەندىلىگىن ارتتىرىپ، ۇلتتىق قۇندىلىقتاردى دارىپتەگەن بۇل ءىس-شارا ءبىلىم سالاسىنا تىڭ سەرپىن بەردى.
