ءماجىلىس دەپۋتاتى ايگۇل قۇسپان قازاقستان–وزبەكستان شەكاراسىنداعى جاسىرىن توننەلدى ەسكە سالىپ، شەكارا ماڭىنداعى جەر تەلىمدەرىن تەكسەرىپ، رەتكە كەلتىرۋدى سۇرادى. ءتيىستى دەپۋتاتتىق ساۋالدى ول پرەمەر-مينيستر ولجاس بەكتەنوۆتىڭ اتىنا جولدادى، دەپ حابارلايدى Dalanews.kz.
دەپۋتاتتىڭ ايتۋىنشا، شەكاراعا جاقىن اۋماقتار مەملەكەت مەنشىگىنە ءوتۋى ءتيىس بولعان. الايدا ءقازىر، ونىڭ سوزىنشە، جەكە تۇلعالار مەن كومپانيالاردىڭ يەلىگىندەگى 3،5 مىڭعا جۋىق جەر تەلىمى بار. بۇل ۋچاسكەلەردە تۇرعىن ۇيلەر، دۇكەندەر مەن جانارماي قۇيۋ بەكەتتەرى زاڭسىز سالىنىپ جاتىر دەگەن دەرەك كەلتىرىلدى.
«باس اسكەري پروكۋراتۋرا بىزگە وسىنداي 312 ۋچاسكە بار ەكەنىن حابارلادى. سونىڭ 87ء-سى تۇركىستان وبلىسىنىڭ سارىاعاش اۋدانىندا ورنالاسقان. اكىمدىكتەر مەن جەر رەسۋرستارىن باسقارۋ كوميتەتىنە پروكۋرورلىق قاداعالاۋ اكتىلەرى ەنگىزىلگەن. الايدا ۇكىمەتتەگى وتىرىس قورىتىندىسىمەن ولاردىڭ ورىندالۋى توقتاتىلعان»، – دەدى ول.
قۇسپاننىڭ ايتۋىنشا، شەكارا ماڭىنداعى جەرلەردى مەملەكەتكە قايتارۋ – كۇردەلى ماسەلە. ءبىراق تەلىمدەردى ماجبۇرلەپ الىپ قويۋدىڭ كەشەۋىلدەۋى شەكارانىڭ كۇزەت ينفراقۇرىلىمىن سالۋ مەن جاڭعىرتۋعا كەدەرگى كەلتىرىپ وتىر.
«شەكارا جولاعىنداعى جەكە مەنشىك نەمەسە ۋاقىتشا پايدالانۋداعى جەر تەلىمدەرى مەملەكەتتىك شەكارا قاۋىپسىزدىگىنە قىلمىستىق قول سۇعۋشىلىققا جاعداي جاسايدى»، – دەدى ماجىلىسمەن.
دەپۋتات ەكى مىسال كەلتىردى:
تۇركىستان وبلىسى سارىاعاش اۋدانىنىڭ دوستىق-2 اۋىلىندا شەكارا جولاعى تۇرعىنداردىڭ اۋلالارىنىڭ ىرگەسىمەن وتەدى. وتكەن جىلدىڭ شىلدەسىندە قىلمىسكەرلەر جالعا العان ۇيدەن ۇزىندىعى 310 مەتر بولاتىن، وزبەكستان اۋماعىنا شىعاتىن جەراستى توننەلى تابىلدى. سول ارقىلى بىرنەشە جىل بويى كونتراباندا تاسىمالدانعان.
ەكىنشى مىسال: قورداي اۋدانىندا شەكارا جولاعىنداعى جەكە اۋلانىڭ اۋماعىنان جەراستى پلاستيك شلانگى تارتىلىپ، سول ارقىلى جانار-جاعارماي قىرعىزستانعا زاڭسىز ايدالىپ وتىرعان.
ايگۇل قۇسپان شەكارا ماڭىنداعى جەر تەلىمدەرىن مەملەكەتتىك مەنشىككە قايتارۋ ماسەلەسىن پرەمەر-مينيستردىڭ جەكە باقىلاۋىنا الۋدى سۇرادى. ول ءۇشىن مىناداي ۇسىنىستارىن ايتتى:
- ۇكىمەت پەن وبلىس اكىمدەرىنە كەشەندى ءىس-قيمىل جوسپارىن ازىرلەۋدى تاپسىرۋ؛
- رەسپۋبليكالىق نەمەسە جەرگىلىكتى بيۋدجەتتەن ءراسىمدى قارجىلاندىرۋ كوزدەرىن ايقىنداپ، بيۋدجەتتىك باعدارلامالارعا جاۋاپتى تۇلعانى بەكىتۋ.
