بۇگىن العاش رەت ءوڭىر جاستارىن قولداۋعا ارنالعان ەرەكشە شارا – «اقبەرەن» جاستار سىيلىعىنىڭ ماراپاتتاۋ كەشى ءوتىپ، بەلسەندى ءارى جالىندى جاستاردىڭ باسىن بىرىكتىردى، دەپ حابارلايدى Dalanews.kz.
شاراعا قاتىسقان وبلىس اكىمى اسحات شاحاروۆ دارىندى جاستاردى قولداۋ – ماڭىزدى مىندەت ەكەنىن ايتىپ، ولاردىڭ ايماقتىڭ دامۋىنا قوسىپ جاتقان ۇلەسىن جوعارى باعالادى.
«بۇگىن ءبىز اقتوبە وبلىسىنىڭ ءبىلىم، سپورت، شىعارماشىلىق جانە قوعامدىق قىزمەت سالالارىندا ەلەۋلى جەتىستىكتەرگە جەتكەن بەلسەندى دە دارىندى جاستارىن قۇرمەتتەپ وتىرمىز. پرەزيدەنتىمىزدىڭ «جاستار – ەلدىڭ ەڭ ۇلكەن كاپيتالى، ەڭ قۋاتتى كۇشى» دەپ ۇنەمى اتاپ ءوتىپ، سونىمەن بىرگە، «ەل بولاشاعى – ءبىلىمدى، ۇلتجاندى، جاۋاپتى ۇرپاقتىڭ قولىندا» دەگەن سوزدەرى بارلىعىمىزعا باعىت-باعدار. وسى تۇجىرىمدار ءبىزدى جاس بۋىندى قولداۋ مەن تاربيەلەۋ ىسىندە ناقتى قادامدار جاساۋعا جەتەلەيدى. ءارقايسىسىڭىز بويىڭىزدا وتانسۇيگىشتىك، جاۋاپكەرشىلىك، ەڭبەكقورلىق پەن شىعارماشىلىق كوزقاراستى قالىپتاستىرۋىڭىز ماڭىزدى. «اقتوبە جاستارى» جانە «تاۋەلسىزدىك ۇرپاقتارى» سياقتى قولداۋ باعدارلامالارى ءوز ماقساتتارىڭىزدى جۇزەگە اسىرۋعا مۇمكىندىك بەرەدى. سىزدەردىڭ جەتىستىكتەرىڭىز – بۇكىل ءوڭىردىڭ ماقتانىشى ءارى وسكەلەڭ ۇرپاققا ۇلگى. الداعى ۋاقىتتا دا تابىستى ەڭبەك ەتىپ، جاڭا بەلەستەردى باعىندىرۋلارىڭىزعا تىلەكتەسپىن!»، – دەدى وبلىس اكىمى.
اسحات شاحاروۆ جاستاردى قولداۋ مەملەكەتتىڭ ستراتەگيالىق باسىمدىعى ەكەنىن اتاپ ءوتتى. بيىل «اقتوبە جاستارى» باعدارلاماسى اياسىندا 109 جاس تۇرعىن ۇيمەن قامتىلدى. بەلسەندى جاستار ءوز جوبالارىن جۇزەگە اسىرۋ ءۇشىن 1،3 ملن تەڭگە كولەمىندەگى «تاۋەلسىزدىك ۇرپاقتارى» گرانتىنا ۇمىتكەر بولا الادى. سونىمەن قاتار «جاسىل ەل» باعدارلاماسى ارقىلى ءۇش مىڭنان استام جاس ماۋسىمدىق جۇمىسپەن قامتىلدى، ال «جايدارمان» جوباسى ولاردىڭ شىعارماشىلىق الەۋەتىن دامىتۋعا ىقپال ەتتى.
ءىس-شارا بارىسىندا ءوڭىر باسشىسى ءتۇرلى سالادا جوعارى جەتىستىكتەرگە جەتكەن جاستارعا العىس ءبىلدىردى. ولاردىڭ قاتارىندا «Dara Bala» ءبىلىم بەرۋ اقپاراتتىق جۇيەسىنىڭ اۆتورى ماقسات بيسەنوۆ، «RobiGroup» كومپانياسىنىڭ نەگىزىن قالاۋشى جانە ەلىمىزدەگى العاشقى گۋمانويد روبوتتى جاساۋشى ەرمەك سەرىكباي، «Thousand IT Group» كومپانياسىنىڭ جەتەكشىسى ايبولات قۇلاتاي بار. سونداي-اق سپورت پەن ونەر سالاسىنىڭ وكىلدەرى دە ماراپاتتالدى. اتاپ ايتقاندا، رەسپۋبليكالىق «التىن دومبىرا» ايتىسىندا ەكىنشى ورىن العان ايتىسكەر نۇربول جاۋىنبايەۆ جانە گرەك-ريم كۇرەسىنەن الەم مەن ازيانىڭ ەكى دۇركىن چەمپيونى جاڭاجول قۋانىشبەك.
«اقبەرەن» سىيلىعىن تابىستاۋ ءراسىمى جەتىستىكتەر مەرەكەسى عانا ەمەس، جاستاردى جاڭا بەلەستەرگە جەتەلەيتىن، قابىلەتتەرىن دامىتۋعا جانە ءوڭىر ومىرىنە بەلسەندى ارالاسۋعا شابىت بەرەتىن ماڭىزدى الاڭعا اينالدى.
اتالعان سىيلىققا بايعانين جانە شالقار اۋداندارىنىڭ «جاستار رەسۋرستىق ورتالىقتارىنىڭ ۇزدىك باسشىلارى» مەيىربولات شاندىباي مەن ايبەك ەمبەرگەنوۆ لايىق دەپ تانىلدى. «ۇزدىك جۋرناليست» اتالىمىن نازەركە الدياروۆا يەلەنسە، «جاستار ءىسى جونىندەگى كوميتەتتىڭ ۇزدىك ءتورايىمى» – جۇلدىز قالدىباي اتاندى. «ۇزدىك جاس كاسىپكەر» – باتىلجان جەتكەرگەن، «ۇزدىك ستۋدەنت» – بەكسۇلتان تولەۋسارى، ال «ۇزدىك قىزمەتكەر» – مارعۇلان ۇمبايەۆ دەپ تانىلدى. «ۇزدىك وفيسەر» اتاعى سايران سيسەنبايعا بەرىلدى، ال «ۇزدىك ۇيىم» نوميناسياسىندا فارحاد ساعىنباي جەڭىسكە جەتتى.
