اتى اڭىزعا اينالعان اقىن ولجاس سۇلەيمەنوۆ الەمدەگى ەڭ بەدەلدى سىيلىققا ۇسىنىلدى. ەگەر ۇسىنىس قابىلدانسا، ول «نوبەل» سىيلىعىن العان العاشقى قازاق بولۋى مۇمكىن. بۇل تۋرالى قازاقستاندىق «بايتاق» جاسىلدار پارتياسىنىڭ IV سەزىندە بەلگىلى بولدى، دەپ حابارلايدى Dalanews.kz.
پارتيانىڭ جيىنىنا ونىڭ ەلدىڭ بارلىق وڭىرلەرىنەن كەلگەن پارتيا دەلەگاتتارى قاتىستى. سەزد اياسىندا، نوبەل كوميتەتىنىڭ تالاپتارىنا قاتاڭ سايكەس، پارتيا اتىنان ولجاس سۇلەيمەنوۆتى نوبەل سىيلىعىنا ۇسىنۋ تۋرالى باستامانى جولداۋدىڭ رەسمي ءراسىمى مەن سالتاناتتى ءراسىمى وتكىزىلدى.
«قازپوشتا» اق ۇلتتىق پوشتا وپەراتورى ولجاس سۇلەيمەنوۆتى بەيبىتشىلىك نوبەل سىيلىعىنا ۇسىنۋ باستاماسىمەن كونۆەرتتى قابىلداپ، جونەلتۋگە رەسىمدەگەنى رەسمي راستالدى. ءراسىم بەلگىلەنگەن حالىقارالىق تالاپتارعا تولىق سايكەس ورىندالدى. سەزدە ءسوز سويلەگەن قازاقستاندىق «بايتاق» جاسىلدار پارتياسىنىڭ ءتوراعاسى ازاماتحان امىرتايەۆ نوبەل كوميتەتىنىڭ تالاپتارىنا سايكەس نوبەل سىيلىعىنىڭ لاۋرەاتتارى، ۋنيۆەرسيتەت رەكتورلارى، مينيسترلەر، دەپۋتاتتار، سونداي — اق قوعامدىق جانە الەۋمەتتانۋ عىلىمدارىنىڭ عالىم-پروفەسسورلارى بەيبىتشىلىك نوبەل سىيلىعىنا ۇمىتكەر بولۋعا قۇقىلى ەكەنىن اتاپ ءوتتى.
«ءبىزدىڭ پارتيانىڭ قۇرامىندا قاجەتتى اكادەميالىق مارتەبەگە يە عالىمدار بار. وسىعان بايلانىستى پارتيانىڭ عىلىمي قوعامداستىعى اتىنان ولجاس سۇلەيمەنوۆتى ۇسىنۋ تۋرالى رەسمي باستاما جولداندى. ۇسىنىس قابىلدانسا سۇلەيمەنوۆ نوۆەل سىيلىعىن العان العاشقى قازاق وتانداسىمىز اتانادى»، — دەدى ازاماتحان امىرتايەۆ.
سەزد جۇمىسىنا قازاقستاندىق «بايتاق» جاسىلدار پارتياسىنىڭ دەپۋتاتتارى، سونداي-اق بەلگىلى قوعام قايراتكەرلەرى، سونىڭ ىشىندە يراك ەلەكەيەۆ، ايكۇل ساماقوۆا، كايۋكوۆ كاريپەك جانە ازاماتتىق قوعامنىڭ باسقا دا وكىلدەرى قاتىستى.
«سونداي-اق، پارتيا ءتوراعاسى جاقىن ارادا ولجاس سۇلەيمەنوۆتىڭ باستاماسىن حالىقارالىق قولداۋدى كەڭەيتۋ جانە ولاردىڭ تاراپىنان كانديداتۋرانى ۇسىنۋ ماقساتىندا فرانسيا وكىلدەرىمەن، سونداي-اق جاپونيا مەن ورتالىق ازيا ەلدەرىندەگى سەرىكتەستەرمەن حالىقارالىق كەلىسسوزدەر جۇرگىزۋ جوسپارلانىپ وتىرعانىن حابارلادى. «بايتاق» جاسىلدار پارتياسى بۇل ۇسىنىستى شوعىرلاندىرىلعان ازاماتتىق ۇستانىمنىڭ كورىنىسى جانە ولجاس سۇلەيمەنوۆتىڭ جاھاندىق بەيبىتشىلىكتى، يادرولىق قاۋىپسىزدىكتى جانە حالىقارالىق ەكولوگيالىق قوزعالىستى نىعايتۋعا قوسقان زور ۇلەسىن مويىنداۋ رەتىندە قاراستىرادى»، — دەلىنگەن پارتيانىڭ حابارلاماسىندا.
