«Almaty aqshamy» گازەتىنىڭ ۇجىمى جىل بويى اتقارعان قاجىرلى ەڭبەگىن ايتۋلى جەتىستىكپەن تۇيىندەدى. باسىلىم «قازاقستانداعى جىل تاڭداۋى» (№1 Choice of the Year in Kazakhstan) ۇلتتىق جوباسى اياسىندا «مەملەكەتتىك تىلدەگى رەسپۋبليكالىق قوعامدىق-ساياسي گازەت» نوميناسياسىنىڭ جەڭىمپازى اتاندى، دەپ حابارلايدى Dalanews.kz.
بۇل ماراپات جىل ىشىندە ساپاسى، ىقپالى جانە ەل ىشىندەگى بەدەلى ەڭ جوعارى دەپ تانىلعان برەندتەر مەن جوبالارعا تابىستالادى.
سالتاناتتى ءراسىم بارىسىندا «Alatau aqparat» مەدياحولدينگىنىڭ باس ديرەكتورى ەرجان قالىمباي ۇلى بۇل جەڭىستىڭ ماڭىزىن اتاپ ءوتتى.
«جوبانىڭ ۇيىمداستىرۋشىلارىنا جانە ءبىزدى باعالاعان بارشا جۇرتقا العىسىمىزدى بىلدىرەمىز. “Almaty aqshamy”-نىڭ “مىڭ جاساعان شاھاردىڭ شامشىراعى” دەپ اتالۋى تەگىن ەمەس. بۇل باسىلىم وتاندىق جۋرناليستيكادا، قازاق رۋحانياتىندا وزىندىك ورنى بار گازەت. وسىندا قازاقتىڭ تالاي مارقاسقالارى ەڭبەك ەتىپ، قولتاڭباسىن قالدىردى. بۇگىندە زامان تالابىنا ساي ۇلكەن ترانسفورماسيالار جاساپ، جاڭا بەت-بەينەمىزدى قالىپتاستىرىپ كەلەمىز. ەلىمىزدەگى ەڭ بەدەلدى بايقاۋدىڭ جۇلدەسى بىزگە بۇيىرۋى – الداعى ۋاقىتتا دا ۇجىمعا ۇلكەن شابىت بەرەدى»، – دەدى ول.
ايتا كەتەيىك، «Almaty aqshamy» گازەتىنىڭ جارىق كورىپ كەلە جاتقانىنا 37 جىل تولدى. باسىلىمدى تەك الماتىلىقتار عانا ەمەس، رەسپۋبليكا تۇرعىندارى مەن شەتەلدىك وقىرماندار دا تۇراقتى تۇردە وقيدى.
