بۇگىن رەسەي فەدەراسياسىنىڭ امۋر وبلىسىندا بورتىندا 43 جولاۋشى بولعان ان-24 جولاۋشىلار ۇشاعى راداردان جوعالىپ كەتتى. كوپ ۇزاماي ونىڭ اپاتقا ۇشىراعانى بەلگىلى بولدى، دەپ حابارلايدى Dalanews.kz.
"انگارا" اۋە كومپانياسىنا تيەسىلى، حاباروۆسك – بلاگوۆەششەنسك – تىندا باعىتىنا قاتىنايتىن جولاۋشىلار ۇشاعىمەن امۋر وبلىسىنا كەلگەندە، ياعني تىندا قالاسىنىڭ اۋەجايىنا بىرنەشە شاقىرىم قالعاندا بايلانىس ۇزىلگەن.
"الدىن الا مالىمەتتەر بويىنشا، ۇشاق بورتىندا 43 جولاۋشى (ونىڭ ىشىندە بەس بالا) جانە التى ەكيپاج مۇشەسى بولعان. ۇشاقتى ىزدەۋگە بارلىق قاجەتتى كۇشتەر مەن قۇرالدار جۇمىلدىرىلعان. ان-24 اۋادا قانداي دا ءبىر ءقاۋىپ تۋرالى بەلگى بەرمەگەن"، دەپ جازادى تاسس.
ۇشاق تىندا اۋەجايىنا قونۋ ءۇشىن ەكىنشى رەت اينالىپ كەلۋگە كەتكەندە راداردان جوعالعان. ىزدەۋ جۇمىستارى بارىسىندا ان-24ء-تىڭ جانىپ جاتقان قالدىقتارى اتالعان قالادان 16 شاقىرىم قاشىقتىقتا تاۋدىڭ باۋرايىنان تابىلدى. الدىن الا مالىمەتتەر بويىنشا، بورتتاعى بارلىق ادام قازا تاپقان.
"الدىن الا بولجام بويىنشا، اۋا-رايىنىڭ قولايسىزدىعىنا بايلانىستى قونۋعا جاقىنداعاندا تاۋ باسىنداعى ۇشكىر تاستى ءىلىپ كەتكەن ەكيپاجدىڭ قاتەلىگى تۋرالى ايتىلادى. باسقا نۇسقالار دا قاراستىرىلىپ، تەكسەرىلۋدە"، - دەيدى تاسس دەرەككوزى.
