ىستامبۇلدا ۋكراينا مەن رەسەي اراسىنداعى كەلىسسوزدەردىڭ ءۇشىنشى كەزەڭى ءوتتى،دەپ حابارلايدى Dalanews.kz.
سارسەنبى كۇنى كەشكە ىستامبۇلدا ۋكراينا مەن رەسەي دەلەگاسيالارى اراسىندا سوعىستى توقتاتۋ جونىندەگى كەلىسسوزدەردىڭ ءۇشىنشى راۋندى ءوتتى. بۇعان دەيىنگى كەزدەسۋلەر سياقتى بۇل جولعى كەلىسسوزدەن دە ساياسي ساراپشىلار مەن كوممەنتاتورلار ايتارلىقتاي سەرپىلىس كۇتپەگەن ەدى — سولاي بولدى: دەلەگاسيالار كەزدەسۋى وتە قىسقا بولدى.
كەلىسسوزدەر ءبىر ساعاتقا جەتپەي اياقتالدى. كەزدەسۋدەن كەيىن ۋكراينا دەلەگاسياسىنىڭ جەتەكشىسى رۋستەم ۋمەروۆ جۋرناليستەرگە كييەۆتىڭ ماسكەۋگە تامىز ايىنىڭ سوڭىنا دەيىن زەلەنسكيي مەن ءپۋتيننىڭ كەزدەسۋىن ۇيىمداستىرۋدى ۇسىنعانىن ايتتى.
الايدا رەسەي مۇنداي كەزدەسۋگە ءالى كەلىسىم بەرگەن جوق. ءتىپتى رەسەي پرەزيدەنتى ۆلاديمير پۋتين بۇعان دەيىن ەشبىر قۇقىقتىق نەگىزسىز ۋكراينا باسشىسى ۆلاديمير زەلەنسكييدى زاڭدى پرەزيدەنت رەتىندە مويىندامايتىنىن مالىمدەگەن بولاتىن.
رۋستەم ۋمەروۆ سونداي-اق ۋكراينا سوعىستى دەرەۋ توقتاتۋعا ۇمتىلىپ جاتقانىن جانە مۇنداي بىتىمگە دايىن ەكەنىن تاعى ءبىر مارتە ايتتى.
رەسەي دەلەگاسياسىنىڭ باسشىسى ۆلاديمير مەدينسكيي كەلىسسوزدەردەن كەيىن جۋرناليستەرگە تاراپتار ءارقايسىسى كەمىندە 1200 تۇتقىننان الماسۋعا كەلىسكەنىن حابارلادى. بۇعان دەيىن رەسەيلىك دەلەگاسياداعى ءاتى-جونى اتالماعان دەرەككوز تاسس اگەنتتىگىنە بۇل الماسۋعا اسكەري تۇتقىندارمەن قاتار، ازاماتتىق تۇلعالار دا كىرەتىنىن ايتقان.
مەدينسكيي سونداي-اق رەسەي تاراپى ۋكرايناعا تاعى 3 مىڭ ۋكراين سولداتىنىڭ ءمايىتىن قايتارۋدى ۇسىنعانىن جەتكىزدى.
ودان بولەك، مەدينسكيي رەسەي دەلەگاسياسى ۋكراين تاراپىنا مايدان شەبىندە 24–48 ساعاتقا دەيىن سوزىلاتىن «قىسقا مەرزىمدى ءبىتىم» جاريالاۋ مۇمكىندىگىن قاراستىرۋدى ۇسىنعانىن مالىمدەدى.
«ماقسات - سانيتارلىق توپتار جارالانعانداردى الىپ كەتۋى ءۇشىن، كومانديرلەر ءوز ساربازدارىنىڭ دەنەسىن شىعارىپ الۋى ءۇشىن مۇمكىندىك جاساۋ»، - دەپ كەلتىرەدى مەدينسكييدىڭ ءسوزىن رەسەيلىك «ينتەرفاكس» اگەنتتىگى.
ىستامبۇلدا وتكەن كەلىسسوزدەردىڭ ءبىرىنشى راۋندى مامىر ايىنىڭ ورتاسىندا ءوتتى. سول كەزدەسۋدە ۋكراينا مەن رەسەي «1000 تۇتقىنعا 1000 تۇتقىن» فورمۋلاسى بويىنشا تۇتقىندارمەن الماسۋعا كەلىسكەن.
كەلىسسوزدەردىڭ ەكىنشى كەزەڭى ماۋسىمنىڭ باسىندا ءوتىپ، تاراپتار سوعىس ارەكەتتەرىن توقتاتۋ شارتتارى تۋرالى مەموراندۋمدارمەن الماستى. سونىمەن قاتار، ەكى ەل سوعىستا قازا تاپقانداردىڭ دەنەلەرىن ءوزارا قايتارۋ تۋرالى ۋاعدالاستى.
كەلىسسوزدەردىڭ ءۇشىنشى كەزەڭى باستالار الدىندا ۋكراينا پرەزيدەنتى ۆلاديمير زەلەنسكيي مالىمدەمە جاساپ، ۋكراين دەلەگاسياسى تاعى دا سوعىستى توقتاتۋ تالابىن قوياتىنىن ايتتى.
«بۇگىن تۇركيادا ءوتىپ جاتقان كەلىسسوزدەردە ۋكراينا وكىلدەرى تاعى دا اتىستى دەرەۋ جانە تولىق توقتاتۋ قاجەتتىگىن العا تارتادى، اسىرەسە ازاماتتىق ينفراقۇرىلىمعا جاسالىپ جاتقان وسىنداي شابۋىلداردى»، - دەدى زەلەنسكيي ءوز ۆيدەوۇندەۋىندە. ول بۇل ءسوزىن سۋمى وبلىسىندا رەسەي دروندارىنىڭ كەزەكتى جاپپاي شابۋىلىنىڭ زارداپتارىن بايانداپ بارىپ ايتتى.
بۇعان قوسا، ۋكرايناداعى ءبىرقاتار باسىلىمدار بيلىككە جاقىن ءانونيمدى دەرەككوزدەرگە سىلتەمە جاساپ، ۋكراينا ءۇشىن كەلىسسوزدەردەگى نەگىزگى نەمەسە نەگىزگى تاقىرىپتاردىڭ ءبىرى پرەزيدەنتتەر ۆلاديمير زەلەنسكيي مەن ۆلاديمير ءپۋتيننىڭ مۇمكىن بولاتىن كەزدەسۋىن ۇيىمداستىرۋ ەكەنىن جازدى.
ەردوعانمەن كەزدەسۋ
ۋكراينا پرەزيدەنتى كەڭسەسىنىڭ باسشىسى اندرەي ەرماكتىڭ حابارلاۋىنشا، كەلىسسوزدەر باستالار الدىندا ول ۋكراينا دەلەگاسياسىنىڭ جەتەكشىسى رۋستەم ۋمەروۆپەن بىرگە تۇركيا پرەزيدەنتى رەجەپ تايىپ ەردوعانمەن انكارادا كەزدەسۋ وتكىزگەن.
بۇل كەزدەسۋدە ۋكراينالىق شەنەۋنىكتەر سوعىستى اياقتاۋعا باعىتتالعان ناقتى كەلىسسوزدەرگە كوشۋ ءۇشىن مەملەكەت باسشىلارىنىڭ زەلەنسكيي، دونالد ترامپ، ەردوعان جانە پۋتين قاتىسۋىمەن سامميت ۇيىمداستىرۋ قاجەت ەكەنىن ايتقان.
