بۇگىن كەنتاۋ قالاسىنا قازاقستان رەسپۋبليكاسى پرەزيدەنتىنىڭ كەڭەسشىسى- حالىقارالىق ەكولوگيالىق ىنتىماقتاستىق جونىندەگى ارناۋلى وكىلى ءزۇلفيا سۇلەيمەنوۆا جۇمىس ساپارىمەن كەلدى،- دەپ حابارلايدى Dalanews.kz

ساپار اياسىندا وبلىس اكىمىنىڭ ورىنباسارى ەرتاي التايەۆپەن بىرگە قالا اۋماعىنداعى ەرەكشە قورعالاتىن تابيعي اۋماق – «قاراتاۋ» قورىعىنا بارىپ، تىنىس-تىرشىلىگىمەن جان-جاقتى تانىستى. قورىق قىزمەتكەرلەرى اتقارىلىپ جاتقان جۇمىستار جايىن بايانداپ، ءوڭىردىڭ بيوالۋاندىلىعى مەن قورعاۋعا الىنعان تابيعي بايلىقتارى تۋرالى مالىمەتتەر ۇسىندى.

قورىقتا 1221 وسىمدىكتىڭ ءتۇرى وسەدى، ونىڭ 59-ى – قىزىل كىتاپقا ەنگەن. ال قۇستاردىڭ 127 ءتۇرى كەزدەسسە، قىزىل كىتاپقا ونىڭ 12ء-سى ەنگىزىلگەن. سونداي-اق ومىرتقاسىزداردىڭ – 1345 ءتۇرى بار، ونىڭ 16-سى قىزىل كىتاپقا ەنگەن. ەلىمىزدەگى ارقاردىڭ 5 ءتۇرىنىڭ ءبىرى – قاراتاۋ ارقارى ءدال وسى ايماقتا مەكەندەيدى.

ءزۇلفيا بولات قىزى مەملەكەت باسشىسىنىڭ تاپسىرماسىنا سايكەس، بيوارتۇرلىلىكتى ساقتاۋ – ۇلتتىق ماڭىزى بار مىندەت ەكەنىن اتاپ ءوتتى. سونىمەن قاتار حالىقارالىق بيوارتۇرلىلىكتى قورعاۋ قورى قۇرىلىپ جاتقانىن جەتكىزدى. بۇل باستاما قورىقتاردىڭ قىزمەتىن كۇشەيتۋگە جانە ەكوتۋريزمدى دامىتۋعا تىڭ سەرپىن بەرەدى.

قوناقتار سونداي-اق قورىقتاعى تاريحي ورىن – «حان تاعى» بولىگىنە بارىپ، قورىقتا جايعاسقان تابيعاتتى تاماشالادى. ودان بولەك، زەرتحانا جۇمىسىمەن تانىسىپ، قورىق قىزمەتكەرلەرىمەن تىلدەستى. مۇندا سيرەك كەزدەسەتىن جاندىكتەر ساقتالىپ، عىلىمي زەرتتەۋلەر جۇرگىزىلەدى.

سونداي-اق پرەزيدەنت كەڭەسشىسى تۇركىستان قالاسىنداعى «جاستار ساياباعى» مەن «سىرداريا-تۇركىستان» مەملەكەتتىك وڭىرلىك تابيعي پاركىنە ارنايى بارىپ، اتقارىلىپ جاتقان جۇمىستارىمەن تانىستى.