2025 جىلدىڭ العاشقى بەس ايىندا وتاندىق ەكسپورتتاۋشىلار سىرتقى ساۋدادا 29،8 ملرد دوللار تابىس تاپتى، بۇل 2024 جىلدىڭ وسىنداي كەزەڭىمەن سالىستىرعاندا 9،2%-عا از (سول كەزدە 32،8 ملرد دوللار بولعان). دەمەك، ەلىمىزگە بىلتىرعى جىلدان 3 ملرد دوللار كەم تابىس تۇسكەن،دەپ حابارلايدى Dalanews.kz.
ق ر ۇلتتىق ستاتيستيكا بيۋروسىنىڭ مالىمەتىنشە، كەمىگەن سومانىڭ نەگىزگى بولىگى، ياعني 2،4 ملرد دوللارى مۇناي مەن گاز سياقتى وتىن-ەنەرگەتيكالىق تاۋارلاردى ەكسپورتتاۋ كەزىندە ورىن العان شىعىندارعا تيەسىلى. 2025 جىلدىڭ قاڭتار–مامىر ايلارى ارالىعىندا قازاقستان شەتەلگە 29،1 ملن توننا مۇناي ساتتى، ال ءبىر جىل بۇرىن بۇل كورسەتكىش 31،2 ملن توننانى قۇراعان (-6،6%). مۇناي ساتۋدان تۇسكەن تابىس تا 13،9%-عا نەمەسە 2،6 ملرد دوللارعا قىسقارىپ، 16،9 ملرد دوللارعا دەيىن تومەندەگەن.
وسى كەزەڭدە مەتاللۋرگيا ونەركاسىبىنىڭ كوپتەگەن تاۋارلارى بويىنشا دا ەكسپورت كولەمى ازايعان: تازارتىلعان مىس – 20،6%، مىس كەندەرى مەن كونسەنتراتتارى – 26،8%، تەمىر كەنى – 16،4%-عا، اليۋمينيي – 10،4% تومەندەگەن. بۇعان قوسا، قازاقستان ءوز ساۋدا سەرىكتەستەرىنە ۋراندى 24،2% از ساتتى.
"سونىمەن قاتار، كەيبىر تاۋارلاردىڭ ەكسپورتى، كەرىسىنشە، ارتتى. مىسالى، فەرروقورىتپالار – 8،1%، بيداي مەن مەسلين – 58،3%، تەمىردەن جاسالعان پروكات – 13،1% وسكەن. بۇدان بولەك وسكەمەندەگى قازاقستان-قىتاي بىرلەسكەن كاسىپورنىندا جۇڭگو ءۇشىن وندىرىلەتىن يادرولىق رەاكتورلارعا ارنالعان جوعارى تەحنولوگيالى بىرەگەي ءونىم – جىلۋ بولگىش جيناقتارىن ەلىمىز ەكى ەسە كوپ ەكسپورتتادى"، - دەيدى Finprom ساراپشىلارى.
قازاقستان ءونىمىنىڭ نەگىزگى ساتىپ الۋشىلارى وزگەرگەن جوق. بىلتىرعىداي، ەكسپورتتىڭ ەڭ ۇلكەن ۇلەسى يتالياعا تيەسىلى – جەتكىزۋلەردىڭ شامامەن شيرەگى نەمەسە 6،9 ملرد دوللار (-11%). ەكىنشى ورىندا – جۇڭگو (5،2 ملرد دوللار)، ءۇشىنشى ورىندا – رەسەي (2،9 ملرد دوللار).
ەكسپورت كولەمىنىڭ اقشالاي ماندە قىسقارۋى قازاقستاننىڭ سىرتقى ساۋدا اينالىمىنىڭ جالپى ديناميكاسىنا كەرى اسەر ەتتى. 2025 جىلدىڭ العاشقى بەس ايىندا سىرتقى ساۋدا اينالىمى 53،5 ملرد دوللاردى قۇرادى، بۇل وتكەن جىلمەن سالىستىرعاندا 4،5% از. سول ۋاقىتتا يمپورت 2،2% وسكەن.
"كەدەندىك ستاتيستيكا دەرەكتەرىنىڭ كوپجىلدىق سەرپىنى قازاقستان ەكسپورتىنىڭ شيكىزاتقا تاۋەلدىلىگى سوڭعى جىلدارى ايتارلىقتاي جوعارى دەڭگەيدە قالىپ وتىرعانىن كورسەتەدى. 2019 جىلدان 2024 جىلعا دەيىن ەكسپورتتاعى وتىن-ەنەرگەتيكا تاۋارلارىنىڭ ۇلەسى 65% -67% شەگىندە اۋىتقىپ وتىردى، ال 2025 جىلعى قاڭتار–مامىردا ولاردىڭ ۇلەس سالماعى 56،9%-عا دەيىن ازايدى. "QazTrade" اق اقپاراتى بويىنشا، وتكەن جىلى سىرتقى ساۋداداعى جوعارى قايتا بولىنگەن تاۋارلاردىڭ ۇلەسى نەبارى 13،5% -دى قۇرادى. بۇل رەتتە ءبىر جىل ىشىندە كورسەتكىش تەك 1،4 پايىزدىق تارماققا ءوستى. وسى جاعىنان العاندا، قازاقستاننىڭ سىرتقى ساۋداداعى وسالدىعى جۇيەلى سيپاتقا ۇلاسىپ بارادى، ويتكەنى مينەرالدى شيكىزات ەلىمىزدىڭ نەگىزگى ەكسپورتتىق تاۋارى بولىپ قالا بەرۋدە، ول ءالى ءارتاراپتاندىرىلماعان"،- دەيدى ساراپشىلار.
بۇعان دەيىن سايتىمىزدا "ەكسپورت قىسقارىپ، يمپورت ۇلعايۋدا". ساراپشىلار الدا تەڭگەگە قىسىم كۇشەيە بەرەتىنىن بولجايدى" دەگەن ماقالا جاريالانعان بولاتىن.
