قاۋىپسىزدىك تەحنيكاسىن ساقتاماۋ سالدارىنان كارەردە جۇمىسشى قازا تاپتى

Dalanews 04 ناۋ. 2024 10:51 1281

 

قايعىلى وقيعا شقو كۇرشىم اۋدانىندا بولعان.

 4 ناۋرىزدا كەشكى ساعات 16.00-دە مارالدى اۋىلىنداعى كارەردە جۇمىس ىستەپ جاتقان “مۋرتازايەۆ” جەكە كاسىپكەرلىگىنىڭ جۇمىسشىسى قاۋىپسىزدىك تەحنيكاسىن ساقتاماۋ سالدارىنان قازا تاپتى.

ول بۋلدوزەر مەن ەكسكاۆاتوردىڭ اراسىندا قىسىلىپ قالعان، حابارلايدى Dalanews.kz پورتالى Altainews.kz - كە سىلتەمە جاساپ.

بىزگە بەلگىلى مالىمەتتەر بويىنشا، باتىپ قالعان كراندى جۇمىسشىلار  بۋلدوزەرگە تىركەپ الىپ شىقپاق بولعان. وسى كەزدە بۋلدوزەر ارتقا قاراي سىرعىپ كەتىپ، كرانشى ەكى تەحنيكانىڭ اراسىندا قالىپ قويعان.

قازا تاپقان ازامات – كومپانيانىڭ شتاتتىق قىزمەتكەرى ەمەس، زايسان اۋدانىنان كەلگەن “مۋرتازايەۆ” جەكە كاسىپكەرلىگىنىڭ جالدامالى جۇمىسشىسى. 

ال بۋلدوزەر جۇرگىزۋشىسى – كۇرشىم اۋدانىنىڭ تۇرعىنى.

الدىن الا بولجام بويىنشا، كىسى ولىمىمەن اياقتالعان وندىرىستەگى بۇل قايعىلى وقيعانىڭ سەبەبى – قاۋىپسىزدىك تەحنيكاسىن ساقتاماۋ.

جاعداي باقىلاۋعا الىندى. وقيعا ورنىنا قۇقىق قورعاۋ ورگاندارىنىڭ، توتەنشە جاعدايلار قىزمەتىنىڭ جانە كۇرشىم اۋدانى اكىمدىگىنىڭ وكىلدەرى دەرەۋ اتتاندى. 

مارالدى اۋىلىنداعى جالدامالى جۇمىسشىنىڭ قازاسىنا بايلانىستى جاعدايدى شقو مەملەكەتتىك ەڭبەك ينسپەكسياسى باسقارماسى دەرەۋ نازارعا الىپ، تەكسەرۋ جۇرگىزۋدى  باستادى.  

وقيعا ورنىنا مەردىگەردىڭ قوسىمشا كۇشتەردى تارتۋىنىڭ زاڭدىلىعى مەن قاۋىپسىزدىگىن، وبەكتىدەگى قاۋىپسىزدىك ەرەجەلەرىنىڭ ساقتالۋىن جانە بولعان وقيعانى وبەكتيۆتى باعالاۋ ءۇشىن تالاپتاردىڭ ورىندالۋىن جان-جاقتى تەكسەرەتىن مەملەكەتتىك ينسپەكتورلار جىبەرىلدى.

شىعىس قازاقستان وبلىسىنىڭ باسشىلىعى جاعدايدى انىقتاپ، كىنالىلەردى جاۋاپقا تارتۋ ءۇشىن قۇزىرلى ورگانداردىڭ الدىنا قاتاڭ تالاپ قويدى.

 
 
 

ۇسىنىلعان
سوڭعى جاڭالىقتار
x