ق ر مەملەكەت جانە قوعام قايراتكەرى، «پاراسات»، «قۇرمەت» وردەندەرىنىڭ يەگەرى ورازگۇل اسانعازى "Parasat" پودكاستىنا بەرگەن سۇحباتىندا تاۋەلسىزدىكتىڭ قازاق ۇلتىنا بەرگەن باستى قۇندىلىقتارى تۋرالى ءسوز قوزعادى، دەپ حابارلايدى Dalanews.kz.
ونىڭ ايتۋىنشا، تاۋەلسىزدىك جىلدارى ەلدە تەك جولدار مەن عيماراتتار سالىنىپ قانا قويعان جوق، ەڭ باستىسى – قازاق حالقىنىڭ دەموگرافيالىق جانە رۋحاني ءوسىمى ايقىن كورىندى.
«تاۋەلسىزدىك قازاققا نە بەردى دەسەك، ءبىز ءوز ەلىمىزدە، ءوز جەرىمىزدە 70 پايىزدان استىق. بۇۇ قاۋلىسىنا سايكەس، ەگەر ءبىر مەملەكەتتە ءبىر ۇلتتىڭ ۇلەسى 62،3 پايىزدان اسسا، ول ءبىر ۇلتتى مەملەكەت بولىپ سانالادى. بۇل – قازاقستان قازاقتىڭ ەلى دەگەن ءسوز»، – دەدى ول.
ورازگۇل اسانعازىنىڭ ايتۋىنشا، بالاباقشا مەن باستاۋىش سىنىپتاردا قازاق تىلىندە وقيتىن بالالاردىڭ ۇلەسى بۇگىندە 90 پايىزعا جەتكەن.
قايراتكەر ءتىل مەن رۋحتىڭ ءوزارا تىعىز بايلانىسىنا ەرەكشە توقتالدى. ونىڭ پىكىرىنشە، انا تىلىندە ءبىلىم الىپ، تاربيە كورگەن بالانىڭ رۋحى بيىك بولادى.
«نەلىكتەن وزبەكتەر ءقازىر ءبىزدى فۋتبولدان، بوكستان جەڭىپ كەتىپ جاتىر؟ سەبەبى ولار ءوز تىلىندە سويلەيدى. ءتىل – رۋح. انا تىلىندە ويلاپ، ءبىلىم العان ۇلتتىڭ بولاشاعى بەرىك بولادى»، – دەدى ول.
سۇحبات بارىسىندا ورازگۇل اسانعازى قازاق تىلىندە ءبىلىم الىپ، الەمدىك دەڭگەيدە جەتىستىككە جەتكەن تۇلعالاردى مىسالعا كەلتىردى. سونىڭ ءبىرى – ءانشى ديماش قۇدايبەرگەن.
«ديماش اقتوبەدەگى قاراپايىم قازاق مەكتەبىندە وقىدى. ول ورىس ءتىلىن ورىس سىنىبىندا وقىعانداردان كەم بىلمەيدى، اعىلشىن ءتىلىن دە ەركىن مەڭگەرگەن. ءبىراق ەڭ باستىسى – ول ءوز انا ءتىلىن سۇيەدى، سول تىلدە ويلايدى، جازادى، سويلەيدى جانە قازاق ءتىلىن الەمگە تانىتىپ ءجۇر»، – دەدى ول.
سونداي-اق ول الەم مويىنداعان ماتەماتيك اسقار جۇمادىلدايەۆتىڭ دا قىزىلوردا وبلىسىنىڭ شيەلى اۋىلىندا قازاق تىلىندە ءبىلىم العانىن اتاپ ءوتتى.
قوعام قايراتكەرى ءسوز سوڭىندا اتا-انالارعا ۇندەۋ جاساپ، بالانىڭ بولاشاعى انا تىلىندە ءبىلىم الۋمەن تىكەلەي بايلانىستى ەكەنىن جەتكىزدى.
«اللا ءار ۇلتقا ءوز ءتىلى مەن بولمىسىن بەرگەن. اللا بەرگەن تىلىندە سويلەپ، ويلاپ، جازاتىن بالانىڭ جولى اشىق بولادى. مەن وسىنى اتا-انالارعا تۇسىندىرگىم كەلەدى»، – دەپ تۇيىندەدى ورازگۇل اسانعازى.
