جاڭاوزەن قالاسىندا 47 جاستاعى ءمۇعالىم دينا جارىلعاسوۆا سەگىز ايدان بەرى ءىز-تۇزسىز جوعالىپ كەتكەن. جاقىندارىنىڭ ايتۋىنشا، وتكەن جىلدىڭ قىركۇيەك ايىندا ۇيىنەن شىققان ايەل سول كۇيى قايتا ورالماعان، دەپ حابارلايدى Dalanews.kz ينفورمبيۋرو باعدارلاماسىنا سىلتەمە جاساپ.
تۋىستارىنىڭ سوزىنشە، كەلىنشەك سول كۇنى بەكەت اتا جەراستى مەشىتى بارىپ، قۇران باعىشتاعىسى كەلگەنىن ايتقان. قىزدارى اناسىن تاڭەرتەڭ بىرگە شىعۋعا كوندىرمەك بولعانىمەن، ول جالعىز ءوزى كەتىپ قالعان. ەڭ الاڭداتارلىعى — ايەل ۇيالى تەلەفونىن دا ۇيدە قالدىرعان.
كەيىن تاكسي جۇرگىزۋشىلەرى ۇستازدى قىزىلساي اۋىلى ماڭىنان كورگەندەرىن جەتكىزگەن. الايدا اتالعان اۋماقتا جۇرگىزىلگەن ىزدەستىرۋ شارالارى ناتيجە بەرمەگەن.
جوعالعان ازاماتتىڭ 13 جانە 23 جاستاعى قىزدارى ىزدەۋ جۇمىستارىنىڭ قايتا جاندانۋىن سۇراپ وتىر. ولاردىڭ ايتۋىنشا، اناسى كلاستاستارىمەن جاقسى ارالاسقان، ەشكىممەن اشىق جانجالى بولماعان.
نەسىبەلى قوبىلان، جوعالعان ايەلدىڭ قىزى، اناسىنىڭ سوڭعى كەزدە تانىستارىمەن ارالاسقانىن ايتىپ، ونىڭ بەلگىسىز جاعدايدا جوعالىپ كەتكەنىنە الاڭداۋشىلىق ءبىلدىردى.
"تاڭەرتەڭ بارايىق دەگەنگە ارامىزدا جانجال تۋىندادى. وكپەمەن كەتكەن بولساڭىز، ءبارىن بىرگە جەڭەمىز، بىرگە وتەمىز، كورەمىز"، - دەدى جوعالعان ءمۇعالىمنىڭ قىزى.
قازىرگى تاڭدا تۋىستارى قۇقىق قورعاۋ ورگاندارىنان ءىستى قايتا قاراپ، قوسىمشا ىزدەستىرۋ كۇشتەرىن تارتۋدى سۇراپ وتىر.
