قىزىلوردا قالاسىندا «22 ناۋرىز – ۇلىستىڭ ۇلى كۇنىنە» ارنالعان «بەرەكە باستاۋى – ءاز ناۋرىز» اتتى مادەني-كوپشىلىك شارادا قول ونەرشى 30 اجە «1000 قۇراق كورپە» كورمەسىن تانىستىردى. سونداي-اق، «بەي، ايداي» ءانىن ايتىپ، شاشۋ شاشىپ، قوناقتارعا تارتۋلارىن ۇسىندى، دەپ حابارلايدى Dalanews.kz
ەسكە سالساق، 2025 جىلى الماتى قالاسىندا 660 قۇراقشىنىڭ قاتىسۋىمەن وتكەن حالىقارالىق شارادا جاڭا جاھاندىق رەكورد ورناتىلعان بولاتىن.
27 قاڭتار كۇنى استانا قالاسىندا 69 ەلدىڭ قاتىسۋىمەن 660 شەبەرگە «الەمدىك رەكوردتار» كىتابىنىڭ مەدالى تابىستالدى. سونىمەن قاتار، جوبا «الەمدىك جەتىستىكتەر ارت-كىتابىنا» ەنگىزىلىپ، قازاقتىڭ قۇراق ونەرى حالىقارالىق دەڭگەيدە مويىندالدى.
اتالعان باستاماعا سىر وڭىرىنەن 56 قولونەر شەبەرى قاتىسىپ، ءوڭىردىڭ رۋحاني الەۋەتىن الەمدىك دەڭگەيدە تانىتۋعا ەلەۋلى ۇلەس قوستى.
ايتا كەتەيىك، 2023 جىلى باستاۋ العان «الامان قۇراق» جوباسى – قازاقتىڭ ءداستۇرلى قۇراق ونەرىن جاڭعىرتىپ، ونى الەمدىك مادەني كەڭىستىككە ەنگىزۋگە باعىتتالعان ماڭىزدى باستاما.
جوبانىڭ نەگىزگى ماقساتى – ۇلتتىق بولمىستى ساقتاۋ، انالار مەن ايەلدەردىڭ قولونەر ارقىلى قوعامداعى ءرولىن ارتتىرۋ جانە ءداستۇرلى ونەردى الەۋمەتتىك-ەكونوميكالىق قولداۋ قۇرالىنا اينالدىرۋ.
