قازاقستان پرەزيدەنتى كاسىم-جومارت توكايەۆ جاقىن ارادا مەملەكەتتىك ناگرادالار قاتارىنا قوجا احمەت ياساۋي ەسىمىمەن اتالاتىن جاڭا وردەن ەنگىزىلەتىنىن مالىمدەدى، دەپ حابارلايدى Dalanews.kz
مەملەكەت باسشىسى بۇل باستاما تاريحي-مادەني مۇرانى دارىپتەۋ جانە ۇلتتىق قۇندىلىقتاردى نىعايتۋ باعىتىنداعى ماڭىزدى قادام ەكەنىن اتاپ ءوتتى. ونىڭ ايتۋىنشا، قازاقستان كونستيتۋسياسىندا ازاماتتاردىڭ تاريحي جانە مادەني مۇرانى ساقتاۋعا مىندەتتى ەكەنى ناقتى كورسەتىلگەن.
پرەزيدەنت تۇركىستان ءوڭىرىنىڭ تاريحي ماڭىزىنا توقتالىپ، بۇل جاڭاشىلدىق ايماق تۇرعىندارى ءۇشىن ەرەكشە مانگە يە ەكەنىن جەتكىزدى. سونداي-اق، ەلدىڭ دامۋى ۇلتتىق بولمىس پەن مادەني نەگىزگە سۇيەنگەندە عانا ىلگەرىلەيتىنىن ايتتى.
ءوز سوزىندە كاسىم-جومارت توكايەۆ قوجا احمەت ياساۋي تۇلعاسىنىڭ الەمدىك دەڭگەيدەگى ماڭىزىن اتاپ ءوتتى. پرەزيدەنتتىڭ پىكىرىنشە، ۇلى ويشىلدى حالىقارالىق دەڭگەيدە كەڭىنەن ناسيحاتتاۋ قاجەت، ءبىراق ەڭ الدىمەن ونى قازاقستان قوعامىنا تەرەڭ تانىستىرۋ ماڭىزدى.
وسىعان بايلانىستى مەملەكەت باسشىسى ياساۋيگە ارنالعان كوركەم جانە دەرەكتى فيلمدەر ءتۇسىرۋ، عىلىمي ەڭبەكتەردى قولداۋ جانە ەلىمىزدىڭ بارلىق وڭىرلەرىندە ونىڭ مۇراسىنا ارنالعان وقۋلار ۇيىمداستىرۋ قاجەتتىگىن ايتتى.
پرەزيدەنتتىڭ مالىمدەۋىنشە، جاڭا وردەن وتاندىق جانە شەتەلدىك عالىمدارعا، سونداي-اق مەملەكەت جانە قوعام قايراتكەرلەرىنە تابىستالماق. ونىڭ مارتەبەسى جوعارى دەڭگەيدە بولادى.
