اتىراۋ وبلىسىندا قازا تاپقان تٶرت ادامنىڭ سٷيەگٸنە جٷرگٸزٸلگەن سوت-مەديتسينالىق ساراپتامانىڭ قورىتىندىسى سوتتا ايتىلدى. ساراپتاما بارىسىندا ناۋرىز مۇقانعاليەۆتٸڭ باس سٷيەگٸ مەيٸتتٸ قازىپ الۋ كەزٸندە دەنەسٸنەن اجىراپ قالۋى مٷمكٸن دەگەن بولجام ايتىلعان, دەپ dalanews.kz تٸلشٸسٸ kznews.kz سايتىنا سٸلتەمە جاساپ حابارلايدى.
اتىراۋدا قايىن جۇرتىنداعى تٶرت ادامدى ٶلتٸردٸ دەپ ايىپتالعان سۇلتان سەرسەمەليەۆكە قاتىستى سوت پروتسەسٸ جالعاسىپ جاتىر. كەزەكتٸ سوت وتىرىسىندا سوتتالۋشىنىڭ ادۆوكاتى ساراپشىعا مەيٸتتٸڭ باس سٷيەگٸ 6-8 اي ٸشٸندە دەنەسٸنەن ٶزدٸگٸنەن اجىراۋى مٷمكٸن بە دەگەن سۇراق قويدى.
بۇعان دەيٸن سوتتا كٶرسەتٸلگەن ۆيدەوماتەريالداردا مارقۇم ناۋرىز مۇقانعاليەۆتٸڭ باسى دەنەسٸنەن بٶلەك جاتقانى بايقالعان ەدٸ.
ساراپشى مۇنداي جاعداي بولۋى مٷمكٸن ەكەنٸن ايتتى. ونىڭ سٶزٸنشە, بۇل مەيٸتتٸڭ قانداي جەردە جاتقانىنa, توپىراقتىڭ قۇرامىنا جەنە شٸرۋ پروتسەسٸنٸڭ قالاي جٷرگەنٸنە بايلانىستى.
"مەيٸتتٸڭ قاي جەردەن تابىلعانىنا, توپىراققا, سٷيەكتٸڭ شٸرۋٸنە دە بايلانىستى. ناۋرىز مۇقانعاليەۆتٸڭ مەيٸتٸن قازىپ الىپ شىققان كەزدە دەنەسٸندە بۇلشىق ەت بولماعان, باس سٷيەگٸ سول كەزدە دە ٷزٸلٸپ كەتۋٸ مٷمكٸن", – دەدٸ ساراپشى.
قازٸرگٸ ۋاقىتتا سۇلتان سەرسەمەليەۆكە قاتىستى سوت وتىرىستارى جالعاسىپ جاتىر. ٸستٸڭ تولىق مەن-جايى سوت بارىسىندا انىقتالماق.
