Atyraý oblysynda qaza tapqan tórt adamnyń súiegine júrgizilgen sot-meditsinalyq saraptamanyń qorytyndysy sotta aityldy. Saraptama barysynda Naýryz Muqanǵalievtiń bas súiegi máiitti qazyp alý kezinde denesinen ajyrap qalýy múmkin degen boljam aitylǵan, dep dalanews.kz tilshisi kznews.kz saityna silteme jasap habarlaidy.
Atyraýda qaiyn jurtyndaǵy tórt adamdy óltirdi dep aiyptalǵan Sultan Sársemálievke qatysty sot protsesi jalǵasyp jatyr. Kezekti sot otyrysynda sottalýshynyń advokaty sarapshyǵa máiittiń bas súiegi 6-8 ai ishinde denesinen ózdiginen ajyraýy múmkin be degen suraq qoidy.
Buǵan deiin sotta kórsetilgen videomaterialdarda marqum Naýryz Muqanǵalievtiń basy denesinen bólek jatqany baiqalǵan edi.
Sarapshy mundai jaǵdai bolýy múmkin ekenin aitty. Onyń sózinshe, bul máiittiń qandai jerde jatqanyna, topyraqtyń quramyna jáne shirý protsesiniń qalai júrgenine bailanysty.
"Máiittiń qai jerden tabylǵanyna, topyraqqa, súiektiń shirýine de bailanysty. Naýryz Muqanǵalievtiń máiitin qazyp alyp shyqqan kezde denesinde bulshyq et bolmaǵan, bas súiegi sol kezde de úzilip ketýi múmkin", – dedi sarapshy.
Qazirgi ýaqytta Sultan Sársemálievke qatysty sot otyrystary jalǵasyp jatyr. Istiń tolyq mán-jaiy sot barysynda anyqtalmaq.
