اقتوبەدە بالكونىندا ماريحۋانا وسىرگەن ەر ادام ۇستالدى، دەپ حابارلايدى Dalanews.kz.
جەدەل اقپاراتتى تەكسەرۋ بارىسىندا پوليسيا قىزمەتكەرلەرى وبلىس ورتالىعىنداعى پاتەرلەردىڭ بىرىنەن ارنايى جابدىقتالعان ەسىرتكى زەرتحاناسىن انىقتادى. جۇرگىزىلگەن ءىس-شارالار ناتيجەسىندە تىيىم سالىنعان وسىمدىكتەردى ءۇي جاعدايىندا وسىرۋمەن اينالىسقان 45 جاستاعى جەرگىلىكتى تۇرعىن ۇستالدى.
تەرگەۋ دەرەكتەرىنە سايكەس، كۇدىكتى ءوز پاتەرىنىڭ بالكونىندا جىلىجايعا بارىنشا جاقىن جاعداي جاساعان. وندا باۋ-باقشا تالاپتارىنا ساي ارنايى جابدىقتار ورناتىلعان: قۇمىرالار، جاساندى جارىقتاندىرۋ قۇرالدارى، جەلدەتۋ جۇيەسى جانە وسىمدىكتىڭ ءوسۋىن ىنتالاندىراتىن قوسىمشا ەرىتىندىلەر پايدالانىلعان. تەكسەرۋ بارىسىندا ەرەكشە ءيىسى بار جاسىل ءتۇستى وسىمدىكتىڭ 5 ءتۇبى انىقتالىپ، تاركىلەندى.
ءار وسىمدىك جەكە قۇمىراعا بولمە وسىمدىگى رەتىندە وتىرعىزىلعان. سونىمەن قاتار توپىراعى بار قۇمىرالار، جەلدەتكىش، سۇيىقتىعى بار پلاستيك ىدىستار، شام جانە قاجەتتى تەمپەراتۋرالىق رەجيمدى ساقتاۋ ءۇشىن قولدانىلعان فولگادان جاسالعان گوفرلەنگەن اۋا وتكىزگىش الىنعان.
بۇدان بولەك، پاتەر ىشىنەن سۋ قۇيىلعان ءمولدىر پلاستيك پروبيركالارعا سالىنعان وسىمدىكتىڭ 15 قالەمشەسى تابىلدى. الدىن الا مالىمەت بويىنشا، بۇل قالەمشەلەر جاڭا تۇپتەر ءوسىرۋ ءۇشىن دايىندالعان. تابىلعان بارلىق زاتتار مەن جابدىقتار ساراپتاماعا جولداندى. كۇدىكتىگە قاتىستى ەسىرتكى قۇرالدارىنىڭ زاڭسىز اينالىمى فاكتىسى بويىنشا سوتقا دەيىنگى تەرگەۋ باستالدى. قازىرگى ۋاقىتتا تۇقىمداردى ساتىپ الۋ ارنالارى مەن تىيىم سالىنعان وسىمدىكتەردى وسىرۋدەگى ماقساتتارى انىقتالۋدا. قۇقىق قورعاۋ ورگاندارى وڭىردە مۇنداي قۇقىق بۇزۋشىلىقتاردى انىقتاۋ جۇمىستارى جالعاساتىنىن مالىمدەدى.
