Aqtóbede balkonynda marihýana ósirgen er adam ustaldy, dep habarlaidy Dalanews.kz.
Jedel aqparatty tekserý barysynda politsiia qyzmetkerleri oblys ortalyǵyndaǵy páterlerdiń birinen arnaiy jabdyqtalǵan esirtki zerthanasyn anyqtady. Júrgizilgen is-sharalar nátijesinde tyiym salynǵan ósimdikterdi úi jaǵdaiynda ósirýmen ainalysqan 45 jastaǵy jergilikti turǵyn ustaldy.
Tergeý derekterine sáikes, kúdikti óz páteriniń balkonynda jylyjaiǵa barynsha jaqyn jaǵdai jasaǵan. Onda baý-baqsha talaptaryna sai arnaiy jabdyqtar ornatylǵan: qumyralar, jasandy jaryqtandyrý quraldary, jeldetý júiesi jáne ósimdiktiń ósýin yntalandyratyn qosymsha eritindiler paidalanylǵan. Tekserý barysynda erekshe iisi bar jasyl tústi ósimdiktiń 5 túbi anyqtalyp, tárkilendi.
Ár ósimdik jeke qumyraǵa bólme ósimdigi retinde otyrǵyzylǵan. Sonymen qatar topyraǵy bar qumyralar, jeldetkish, suiyqtyǵy bar plastik ydystar, sham jáne qajetti temperatýralyq rejimdi saqtaý úshin qoldanylǵan folgadan jasalǵan gofrlengen aýa ótkizgish alynǵan.
Budan bólek, páter ishinen sý quiylǵan móldir plastik probirkalarǵa salynǵan ósimdiktiń 15 qalemshesi tabyldy. Aldyn ala málimet boiynsha, bul qalemsheler jańa túpter ósirý úshin daiyndalǵan. Tabylǵan barlyq zattar men jabdyqtar saraptamaǵa joldandy. Kúdiktige qatysty esirtki quraldarynyń zańsyz ainalymy faktisi boiynsha sotqa deiingi tergeý bastaldy. Qazirgi ýaqytta tuqymdardy satyp alý arnalary men tyiym salynǵan ósimdikterdi ósirýdegi maqsattary anyqtalýda. Quqyq qorǵaý organdary óńirde mundai quqyq buzýshylyqtardy anyqtaý jumystary jalǵasatynyn málimdedi.
