جۋرناليست گۇلبانۋ ابەنوۆا ءوزىنىڭ «Facebook» جەلىسىندەگى ءبىرقاتار جاريالانىمدارىندا «Orda.kz» باسىلىمىنىڭ باس رەداكتورى گۇلنار باجكەنوۆانىڭ قورعاۋشىسى ادۆوكات مۇرات ادامنىڭ ءومىربايانىندا جاعىمسىز جايتتاردىڭ بار ەكەنىن جازادى، دەپ حابارلايدى Dalanews.kz.

ول ءوز جازبالارىندا قورعاۋشىنىڭ 2000-شى جىلداردىڭ سوڭىنداعى سوتتىلىعى، ودان كەيىن سوت جۇيەسىندە قىزمەت اتقارۋى جانە ادۆوكاتتىق مارتەبەنى قانداي نەگىزدە العانى تۋرالى ماسەلەنى كوتەرۋدە.

سوتتىلىق جانە قىلمىستىق ءىستىڭ ءمان-جايى

ابەنوۆانىڭ جاريالانىمدارىنا سايكەس، 2008 جىلى مۇرات ادام (ونىڭ كەيبىر جازىلۋشىلارىنىڭ ايتۋىنشا، بۇرىنعى فاميلياسى بايعالييەۆ بولعان) قازاقستان رەسپۋبليكاسىنىڭ قىلمىستىق كودەكسىنىڭ 129 جانە 130-باپتارى – ياعني جالا جابۋ جانە قورلاۋ بويىنشا كىنالى دەپ تانىلعان.

كەلتىرىلگەن مالىمەتكە سايكەس، قىلمىستىق ءىس 2007 جىلعى وقيعاعا بايلانىستى بولعان. يۋريست بولىپ جۇرگەن كەزىندە مۇرات ادام سوت وتىرىسىنان كەيىن قارسى تاراپتىڭ كۋاگەرى بولعان 68 جاستاعى ايەل كىسىمەن جانجالداسىپ كەتىپ، وعان بالاعات ءسوز ايتقان. وقيعا سوت عيماراتىندا بولعان، سودان كەيىن ايەل پوليسياعا ارىزدانعان.

ابەنوۆا ارەكەت ەتىپ جۇرگەن ادۆوكاتتاردىڭ بىرىنە سىلتەمە جاساي وتىرىپ، سوتتىڭ جازا رەتىندە 120 ساعات قوعامدىق جۇمىس تاعايىنداعانىن جازادى.

سونىمەن قاتار، مۇرات ادامنان 90 مىڭ تەڭگە سوت شىعىندارى، سونداي-اق 50 مىڭ تەڭگە مورالدىق زيان وتەماقىسى وندىرىلگەن.

بەينەجازبا جانە نۇسقالاردىڭ سايكەس كەلمەۋى

جۋرناليست وقىرماندارى جىبەرگەن بەينەجازباعا دا نازار اۋدارادى. ۆيدەو رەسپۋبليكالىق ادۆوكاتتار القاسىنىڭ ءتوراعاسىن سايلاۋ كەزىندە تۇسىرىلگەن جانە وندا مۇرات ادام سوتتىلىعى بار-جوعى تۋرالى سۇراققا جاۋاپ بەرەدى.

بەينەجازبادا ادۆوكات بولعان جاعدايدى «ۇساق قۇقىقبۇزۋشىلىق» دەپ اتاپ، جانجال «كورشى اجەيمەن» بولعانىن ايتادى. الايدا ابەنوۆانىڭ ايتۋىنشا، بۇل نۇسقا ءىس ماتەريالدارىنا قايشى: وقيعا تۇرمىستىق جاعدايدا ەمەس، سوت عيماراتىندا، ال ايەل سول ىستەگى كۋاگەر بولعان.

جۋرناليست قىلمىستىق ءىستىڭ قوزعالۋىنا سوت دالىزىندە تەلەباعدارلاما وپەراتورى تۇسىرگەن اۋديو جانە بەينەجازبا سەبەپ بولعانىن جازادى. ونىڭ ايتۋىنشا، بۇل جازبا ءىس ماتەريالدارىنا تىركەلىپ، وپەراتور سوتتا كۋالىك بەرگەن. ءسويتىپ، مۇرات ادامنىڭ جازبانى داۋلاۋعا جاسالعان ارەكەتى بولماي قالعان.

قالايشا الدىمەن سۋديا بولىپ، ارتىنان ادۆوكات مارتەبەسىن العان؟!

گۇلبانۋ ابەنوۆا ءوز جاريالانىمدارىندا تەگىن وزگەرتكەننەن كەيىن 2012–2018 جىلدارى مۇرات ادام قوستاناي قالالىق سوتىنىڭ سۋدياسى بولىپ قىزمەت اتقارعانىن دا العا تارتادى. ونىڭ ايتۋىنشا، سول كەزدە سيفرلىق دەرەكقورلار بولماعاندىقتان، سوتتىلىق فاكتىسى انىقتالماي قالعان بولۋى مۇمكىن.

جۋرناليست 2018 جىلى سوتتىلىعى تۋرالى مالىمەت بەلگىلى بولعاننان كەيىن مۇرات ادامنىڭ سۋديا قىزمەتىنەن بوساتىلعانىن جازادى.

سونىمەن قاتار، ابەنوۆا ءوزىنىڭ جازىلۋشىلارىنىڭ ءبىرىنىڭ حابارلاماسىنا سىلتەمە جاسايدى. ونىڭ ايتۋىنشا، بۇل ادام ادام-بايعالييەۆپەن بىرگە جۇمىس ىستەگەن. ول مۇرات ادامنىڭ جۇمىسىن تەرىس سيپاتتاپ، «كوپ ينتريگا جاساعانىن» ايتادى، سونداي-اق ەڭبەككە جارامسىزدىق پاراعىن قولدان جاساۋى مۇمكىن دەگەن مالىمدەمە كەلتىرەدى. بۇل دەرەكتەردىڭ بارلىعى دەرەككوزدىڭ جەكە پىكىرلەرى ەكەنى ارنايى اتاپ وتىلەدى.

سۇراق كوپ، جاۋاپ ءالى جوق...

وسىنىڭ ءبارىن نەگىزگە الا وتىرىپ، گۇلبانۋ ابەنوۆا ۋاكىلەتتى ورگاندار تاراپىنان قۇقىقتىق باعا بەرۋدى قاجەت ەتەتىن ءبىرقاتار ماڭىزدى سۇراقتاردى كوتەرەدى. بىرىنشىدەن، قۇجاتتاردى قولدان جاساۋ ءۇشىن قىلمىستىق جاۋاپكەرشىلىك كوزدەلگەن بە؟ ەكىنشىدەن، سوتتىلىعى انىقتالعان سوڭ سۋديا قىزمەتىنەن بوساتىلعان ادام سول كەزەڭدە العان جالاقىسىن مەملەكەت بيۋدجەتىنە قايتارۋى ءتيىس پە؟ سونداي-اق ونىڭ سۋديا بولعان كەزەڭىندە شىعارعان سوت شەشىمدەرى قايتا قارالۋى كەرەك؟

ەڭ قىزىعى رەسپۋبليكالىق ادۆوكاتتار القاسى نەگە ۇندەمەي وتىر؟ دوسىڭنىڭ كىم ەكەنىن ايت، سوندا سەنىڭ كىم ەكەنىڭدى ايتايىن دەگەندەي، وتكەنى كۇماندى جايتتارعا تولى مۇرات ادام-بايعالييەۆ سياقتى ادۆوكات پەن گۇلنار باجكەنوۆانىڭ باستارى قالاي قوسىلىپ ءجۇر؟