الەۋمەتتىك جەلىدە قازاقستاننىڭ تۇڭعىش پرەزيدەنتى نۇرسۇلتان نازاربايەۆتىڭ ءبىر توپ بۇلدىرشىنمەن تۇسكەن سۋرەتى جانە ۆيدەوسى تارادى، دەپ حابارلايدى Dalanews.kz.
كادرلاردا ول بالالارمەن بىرگە ەلباسى مۋزەيىن ارالاپ جۇرگەنى بايقالادى. نازاربايەۆ ولارمەن جىلى جۇزدەسىپ، ەستەلىك سۋرەتكە تۇسكەن.
ايتا كەتەيىك، ەلباسى مۋزەيى استاناداعى بۇرىنعى رەزيدەنسيا عيماراتىندا ورنالاسقان. وندا مەملەكەت قۇرۋ كەزەڭىنە قاتىستى تاريحي دەرەكتەر، جەكە زاتتار مەن سىيلىقتار قويىلعان.
ەسكە سالايىق، جاقىندا قازاقستاننىڭ تۇڭعىش پرەزيدەنتى نۇرسۇلتان نازاربايەۆ استاناداعى ورتالىق مەشىتتە كوزگە تۇسكەن ەدى.
ۆيدەونى مەشىت ازانشىسى قۋانىش سەيىتحانوۆ الەۋمەتتىك جەلىدەگى پاراقشاسىندا جاريالادى. كادرلاردا نۇرسۇلتان نازاربايەۆ كۇزەت قىزمەتكەرلەرىمەن بىرگە مەشىت ءىشىن ارالاپ جۇرگەنى كورىنەدى.
"21 ماۋسىمدا ق ر تۇڭعىش پرەزيدەنتى نۇرسۇلتان ءابىش ۇلى نازاربايەۆ باس مەشىتكە كەلدى"، - دەپ جازعان ول.
سونداي-اق كادرلاردان نازاربايەۆتىڭ مەشىتتەگى حالىقپەن تىلدەسكەنى دە كورىنەدى.
"امان بولىڭىز، دەنىڭىز ساۋ بولسىن! ءجۇز جاساڭىز!" - دەپ تىلەگەن حالىق ۆيدەودا.
سونىمەن قاتار بۇعان دەيىن نازاربايەۆ ماسكەۋگە دە جەكە شاقىرۋ بويىنشا بارىپ، رەسەي پرەزيدەنتى ۆلاديمير پۋتينمەن جۇزدەسكەن ەدى. ونىڭ بۇل ساپارى قوعامدا ءتۇرلى الىپ-قاشپا اڭگىمە، كۇمان-كۇدىك تۋۋىنا سەبەپ بولدى.
ال ەكس-پرەزيدەنتتىڭ باسپا ءسوز حاتشىسى ايدوس ۇكىبايدىڭ ايتۋىنشا، تۇڭعىش پرەزيدەنت الەمنىڭ ءبىرقاتار ەلىنىڭ كوشباسشىلارىمەن تەلەفون ارقىلى سويلەسىپ، حات الماسىپ، كەيدە جەكە كەزدەسىپ تۇرادى.
