شەشەنستاننىڭ قاۋىپسىزدىك كەڭەسىنىڭ حاتشىسى، رامزان كادىروۆتىڭ ۇلى ادام كادىروۆ رەسپۋبليكادا ءوز اتىمەن اتالعان سپورت كەشەنىن اشتى. بۇل تۋرالى نادتەرەچنىي اۋدانىنىڭ اكىمدىگى باسشىسى حامزات حاسانوۆ ءوزىنىڭ Telegram-ارناسىندا جاريالادى، دەپ حابارلايدى Dalanews.kz.

حاسانوۆ جاريالاعان بەينەروليكتە جاڭا سپورت زالدارىنىڭ كورىنىستەرى كورسەتىلگەن. سالتاناتتى راسىمگە شەشەنستاننىڭ جاستار ءىسى جونىندەگى ءمينيسترى رامزان ۆيسمۋرادوۆ جانە جوبانىڭ نەگىزىن قالاۋشى، UFC چەمپيونى حامزات چيمايەۆ قاتىستى.

اكىمنىڭ ايتۋىنشا، سپورت كەشەنى زاماناۋي جابدىقتارمەن تولىق قامتاماسىز ەتىلگەن.

«ول جاڭا بۋىن چەمپيوندارىن تاربيەلەۋ ورتالىعى عانا ەمەس، بۇكىل اۋدان جاستارىنىڭ دەنە شىنىقتىرۋ جانە بوس ۋاقىتىن ءتيىمدى وتكىزۋ ورتالىعىنا اينالادى»، - دەدى حاسانوۆ.

سپورت كەشەنى «Dustum» دەپ اتالادى - بۇل ادام كادىروۆتىڭ لاقاپ اتى. رامزان كادىروۆتىڭ سوزىنشە، جاس كەزىندە وعان دا ءدال وسى «دۋستۋم» دەگەن پوزىۆنوي بەرىلگەن. چەشەن تىلىنەن اۋدارعاندا «دوستار» دەگەن ماعىنا بەرەدى.

بۇعان دەيىن، قىركۇيەك ايىندا، ادام كادىروۆ ومون-نىڭ «احمات-كرەپوست» اتتى مەرەيتويلىق مەدالىمەن ماراپاتتالعان ەدى. رامزان كادىروۆ ۇلىنىڭ ەشقانداي ماراپاتتى «جايدان-جاي» المايتىنىن اتاپ ءوتتى. ونىڭ ايتۋىنشا، 17 جاستاعى ۇلىنا بەرىلگەن ءاربىر ماراپات ناقتى جەتىستىكتەرى ءۇشىن تابىستالعان.